ਨਵੀਂ ਦਿੱਲੀ : ਦਿੱਗਜ ਲੈੱਗ ਸਪਿਨਰ ਸ਼ੇਨ ਵਾਰਨ ਨੇ ਗੇਂਦਬਾਜ਼ਾਂ ਨੂੰ ਸਲਾਹ ਦਿੱਤੀ ਹੈ ਕਿ ਭਾਰਤੀ ਕਪਤਾਨ ਵਿਰਾਟ ਕੋਹਲੀ ਦੇ ਹਮਲੇ ਤੋਂ ਬਚਣ ਲਈ ਉਨ੍ਹਾਂ ਨੂੰ ਸਿੱਧੀ ਗੇਂਦ ਸੁੱਟਣ ਦੀ ਥਾਂ ਲੈਗ ਸਟੰਪ ਜਾਂ ਫਿਰ ਆਫ ਸਟੰਪ ਦੇ ਬਾਹਰ ਗੇਂਦਬਾਜ਼ਾ ਕਰੋ।

ਆਸਟ੍ਰੇਲੀਆ ਦੇ ਇਸ ਸਾਬਕਾ ਗੇਂਦਬਾਜ਼ ਨੇ ਕਿਹਾ ਕਿ ਜੇਕਰ ਤੁਸੀਂ ਕੋਹਲੀ ਨੂੰ ਗੇਂਦਬਾਜ਼ੀ ਕਰ ਰਹੇ ਹੋ ਤਾਂ ਲੈਗ ਸਟੰਪ 'ਤੇ ਗੇਂਦਬਾਜ਼ੀ ਕਰੋ ਅਤੇ ਫੀਲਡਿੰਗ ਉਧਰ ਹੀ ਰੱਖੋ ਅਤੇ ਜੇਕਰ ਤੁਸੀਂ ਆਫ਼ ਸਟੰਪ ਦੇ ਬਾਹਰ ਗੇਂਦਬਾਜ਼ੀ ਕਰ ਰਹੇ ਹੋ ਤਾਂ ਫੀਲਡਿੰਗ ਵੀ ਉਸੇ ਪਾਸੇ ਰੱਖੋ। ਤੁਸੀਂ ਉਨ੍ਹਾਂ ਨੂੰ ਵਿਕਟ ਟੂ ਵਿਕਟ ਗੇਂਦਬਾਜ਼ੀ ਨਹੀਂ ਕਰ ਸਕਦੇ। ਉਹ ਮੈਦਾਨ ਦੇ ਦੋਵੇਂ ਪਾਸੇ ਸ਼ਾਟ ਮਾਰ ਸਕਦੇ ਹਨ। ਮੈਨੂੰ ਲੱਗਦਾ ਹੈ ਕਿ ਤੁਹਾਨੂੰ ਮੈਦਾਨ ਦੇ ਇਕ ਹਿੱਸੇ 'ਤੇ ਜ਼ਿਆਦਾ ਧਿਆਨ ਦੇਣਾ ਹੋਵੇਗਾ। ਕਿਸੇ ਵੀ ਚੰਗੇ ਬੱਲੇਬਾਜ਼ ਨੂੰ ਤੁਹਾਨੂੰ ਮੈਦਾਨ ਦੇ ਇਕ ਹਿੱਸੇ ਦਾ ਬਚਾਅ ਕਰਕੇ ਗੇਂਦਬਾਜ਼ੀ ਕਰਨੀ ਚਾਹੀਦੀ ਹੈ।'

ਵਾਰਨ ਨੇ ਕੋਹਲੀ ਨੂੰ ਹਾਲਾਂਕਿ ਦੁਨੀਆ ਦਾ ਸਰਬਸ੍ਰੇਸ਼ਠ ਬੱਲੇਬਾਜ਼ ਨਹੀਂ ਮੰਨਿਆ, ਪਰ ਕਿਹਾ ਕਿ ਉਨ੍ਹਾਂ ਵਨ-ਡੇ 'ਚ ਅਜਿਹੇ 'ਪ੍ਰਭੂਤਵ' ਵਾਲਾ ਖਿਡਾਰੀ ਨਹੀਂ ਵੇਖਿਆ। ਉਨ੍ਹਾਂ ਕਿਹਾ, 'ਮੇਰੇ ਤੋਂ ਇਹ ਸਵਾਲ ਵਾਰ-ਵਾਰ ਪੁੱਛਿਆ ਜਾਂਦਾ ਹੈ ਕਿ ਕੀ ਵਿਰਾਟ ਵਨ-ਡੇ ਦੇ ਸਰਬਸ੍ਰੇਸ਼ਠ ਖਿਡਾਰੀ ਹਨ? ਕੀ ਉਹ ਸਚਿਨ ਤੇਂਦੁਲਕਰ ਤੇ ਬ੍ਰਾਇਨ ਲਾਰਾ ਤੋਂ ਬਿਹਤਰ ਹਨ? ਤਾਂ ਮੈਂ ਇਸ ਬਾਰੇ ਅਜੇ ਵੀ ਸੋਚ ਰਿਹਾ ਹਾਂ। ਇਸ ਦਾ ਜਵਾਬ ਲੱਭ ਰਿਹਾ ਹਾਂ। ਮੈਂ ਇਕ ਗੱਲ ਕਹਿ ਸਕਦਾ ਹਾਂ ਕਿ ਮੈਂ ਵਨ-ਡੇ ਕ੍ਰਿਕਟ 'ਚ ਕਿਸੇ ਵੀ ਖਿਡਾਰੀ ਨੂੰ ਵਿਰਾਟ ਵਾਂਗ ਦਬਦਬਾ ਬਣਾ ਕੇ ਖੇਡਦੇ ਹੋਏ ਨਹੀਂ ਵੇਖਿਆ ਹੈ। ਡਾਨ ਬ੍ਰੈਡਮੈਨ ਸਰਬਸ੍ਰੇਸ਼ਠ ਰਹੇ ਹਨ, ਪਰ ਕੋਹਲੀ ਉਨ੍ਹਾਂ ਦੇ ਕਰੀਬ ਨਹੀਂ ਪੁੱਜੇ ਹਨ। ਮੈਂ ਜਿੰਨਾ ਕ੍ਰਿਕਟ ਵੇਖਿਆ ਹੈ ਉਸ 'ਚ ਵਿਵ ਰਿਚਰਡਜ਼ ਸਰਬਸ੍ਰੇਸ਼ਠ ਖਿਡਾਰੀ ਰਹੇ ਹਨ। ਜਿਨ੍ਹਾਂ ਖਿਡਾਰੀਆਂ ਖ਼ਿਲਾਫ਼ ਮੈਂ ਖੇਡਿਆ ਹਾਂ, ਉਸ 'ਚ ਲਾਰਾ ਤੇ ਤੇਂਦੁਲਕਰ ਸਰਬਸ੍ਰੇਸ਼ਠ ਰਹੇ ਹਨ'।

ਨਵੀਂ ਦਿੱਲੀ : ਪਦਮ ਪੁਰਸਕਾਰਾਂ ਲਈ ਚੁਣੀਆਂ ਗਈਆਂ 112 ਹਸਤੀਆਂ ਵਿਚੋਂ 56 ਨੂੰ ਰਾਸ਼ਟਰਪਤੀ ਰਾਮਨਾਥ ਕੋਵਿੰਦ ਸੋਮਵਾਰ ਨੂੰ ਸਨਮਾਨਿਤ ਕਰਨਗੇ। ਰਾਸ਼ਟਰਪਤੀ ਭਵਨ 'ਚ ਕਰਵਾਏ ਜਾ ਰਹੇ ਵਿਸ਼ੇਸ਼ ਸਮਾਗਮ 'ਚ ਮਰਹੂਮ ਅਭਿਨੇਤਾ ਕਾਦਰ ਖ਼ਾਨ ਨੂੰ ਮਰਨ ਉਪਰੰਤ ਪਦਮਸ਼੍ਰੀ ਜਦਕਿ ਅਕਾਲੀ ਦਲ ਦੇ ਆਗੂ ਸੁਖਦੇਵ ਸਿੰਘ ਢੀਂਡਸਾ ਅਤੇ ਉੱਘੇ ਪੱਤਰਕਾਰ ਕੁਲਦੀਪ ਨਈਅਰ (ਮਰਨ ਉਪਰੰਤ) ਨੂੰ ਪਦਮ ਭੂਸ਼ਣ ਸਨਮਾਨ ਨਾਲ ਨਿਵਾਜਿਆ ਜਾਵੇਗਾ। ਬਾਕੀ 56 ਹਸਤੀਆਂ ਨੂੰ 16 ਮਾਰਚ ਨੂੰ ਕਰਵਾਏ ਜਾਣ ਵਾਲੇ ਦੂਜੇ ਸਮਾਗਮ ਵਿਚ ਸਨਮਾਨਿਤ ਕੀਤਾ ਜਾਵੇਗਾ।

ਗ੍ਰਹਿ ਮੰਤਰਾਲੇ ਦੇ ਇਕ ਅਧਿਕਾਰੀ ਅਨੁਸਾਰ ਮਹਾਰਾਸ਼ਟਰ ਦੇ ਪ੍ਰਸਿੱਧ ਥੀਏਟਰ ਕਲਾਕਾਰ ਬਾਬਾ ਸਾਹਿਬ ਪੁਰੰਦਰੇ ਉਰਫ਼ ਬਲਵੰਤ ਮੋਰੇਸ਼ਵਰ ਪੁਰੰਦਰੇ ਨੂੰ ਪਦਮ ਵਿਭੂਸ਼ਣ, ਬਿਹਾਰ ਦੇ ਨੇਤਾ ਹੁਕਮਦੇਵ ਨਾਰਾਇਣ ਯਾਦਵ ਨੂੰ ਪਦਮ ਭੂਸ਼ਣ ਅਤੇ ਤਕਨਾਲੋਜੀ ਖੇਤਰ ਦੀ ਮੋਹਰੀ ਕੰਪਨੀ ਸਿਸਕੋ ਸਿਸਟਮ ਦੇ ਸਾਬਕਾ ਸੀਈਓ ਜਾਨ ਚੈਂਬਰਸ ਅਤੇ ਮਸ਼ਹੂਰ ਡਾਂਸਰ ਅਤੇ ਫਿਲਮ ਨਿਰਮਾਤਾ ਪ੍ਰਭੂ ਦੇਵਾ ਨੂੰ ਪਦਮਸ਼੍ਰੀ ਨਾਲ ਨਿਵਾਜਿਆ ਜਾਵੇਗਾ। ਸਮਾਗਮ ਵਿਚ ਉਪ ਰਾਸ਼ਟਰਪਤੀ ਵੈਂਕਈਆ ਨਾਇਡੂ ਅਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਸਮੇਤ ਹੋਰ ਹਸਤੀਆਂ ਮੌਜੂਦ ਰਹਿਣਗੀਆਂ। ਪਦਮ ਪੁਰਸਕਾਰਾਂ ਦਾ ਐਲਾਨ 25 ਜਨਵਰੀ ਨੂੰ ਕੀਤਾ ਗਿਆ ਸੀ। ਕੇਂਦਰੀ ਗ੍ਰਹਿ ਮੰਤਰੀ ਰਾਜਨਾਥ ਸਿੰਘ ਐਤਵਾਰ ਨੂੰ ਪਦਮ ਪੁਰਸਕਾਰ ਪਾਉਣ ਵਾਲੀਆਂ ਹਸਤੀਆਂ ਅਤੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਨਾਲ ਮੁਲਾਕਾਤ ਕਰਨਗੇ।

-ਗੱਡੀਆਂ 'ਚ ਸਪਲਾਈ ਕਰਦੇ ਸਨ ਭੁੱਕੀ

-ਪਹਿਲਾਂ ਵੀ ਅੱਧੀ ਦਰਜਨ ਮੁਕੱਦਮੇ ਦਰਜ

-301 ਜਗਰਾਓਂ ਪੁਲਿਸ ਲਾਈਨ 'ਚ ਪ੍ਰੈਸ ਕਾਨਫਰੰਸ ਨੂੰ ਸੰਬੋਧਨ ਕਰਦੇ ਐੱਸਐੱਸਪੀ ਵਰਿੰਦਰ ਸਿੰਘ ਬਰਾੜ, ਐੱਸਪੀ ਰੁਪਿੰਦਰ ਭਾਰਦਵਾਜ ਅਤੇ ਡੀਐੱਸਪੀ ਦਿਲਬਾਗ ਸਿੰਘ।

ਸੰਜੀਵ ਗੁਪਤਾ, ਜਗਰਾਓਂ

ਪੁਲਿਸ ਜ਼ਿਲ੍ਹਾ ਲੁਧਿਆਣਾ ਦਿਹਾਤੀ ਦੀ ਪੁਲਿਸ ਨੇ ਬਾਹਰਲੇ ਸੂਬਿਆਂ ਤੋਂ ਕਾਰਾਂ 'ਚ ਭੁੱਕੀ ਲਿਆ ਕੇ ਸੂਬੇ ਭਰ 'ਚ ਸਪਲਾਈ ਕਰਨ ਵਾਲੇ ਦੋ ਗਿਰੋਹਾਂ ਦਾ ਪਰਦਾਫਾਸ਼ ਕਰਦਿਆਂ ਦੋਵਾਂ ਦੇ ਇਕ-ਇਕ ਸਾਥੀ ਨੂੰ ਗਿ੍ਫਤਾਰ ਕਰ ਲਿਆ, ਜਦ ਕਿ ਦੋਵਾਂ ਦੇ ਇਕ-ਇਕ ਸਾਥੀ ਭੱਜ ਨਿਕਲੇ। ਇਸ ਮਾਮਲੇ 'ਚ ਦਿਲਚਸਪ ਪਹਿਲੂ ਇਹ ਹੈ ਕਿ ਇਕ ਗੈਂਗ ਦੀ ਰਸਤੇ ਵਿਚ ਗੱਡੀ ਹਾਦਸਾਗ੍ਸਤ ਹੋ ਜਾਣ 'ਤੇ ਉਹ ਰਿਕਵਰੀ ਵੈਨ ਰਾਹੀਂ ਹਾਦਸੇ ਵਾਲੀ ਭੁੱਕੀ ਨਾਲ ਭਰੀ ਗੱਡੀ ਲੈ ਕੇ ਆ ਰਹੇ ਸਨ। ਐਤਵਾਰ ਨੂੰ ਜ਼ਿਲ੍ਹੇ ਦੇ ਐੱਸਐੱਸਪੀ ਵਰਿੰਦਰ ਸਿੰਘ ਬਰਾੜ ਨੇ ਪ੍ਰੈਸ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਦੱਸਿਆ ਕਿ ਐੱਸਪੀ ਰੁਪਿੰਦਰ ਭਾਰਦਵਾਜ ਤੇ ਡੀਐੱਸਪੀ ਦਿਲਬਾਗ ਸਿੰਘ ਦੀ ਜੇਰੇ ਨਿਗਰਾਨੀ ਹੇਠ ਸੀਆਈਏ ਸਟਾਫ਼ ਦੇ ਮੁਖੀ ਇੰਸਪੈਕਟਰ ਇਕਬਾਲ ਹੁਸੈਨ ਸਮੇਤ ਪੁਲਿਸ ਪੁੱਲ ਨਹਿਰ ਪਿੰਡ ਤੁਗਲ ਮੌਜੂਦ ਸੀ ਤਾਂ ਸੂਚਨਾ ਮਿਲਣ 'ਤੇ ਉਨ੍ਹਾਂ ਨੇ ਟੋਲ ਪਲਾਜਾ ਪਿੰਡ ਬੋਪਾਰਾਏ ਨੇੜੇ ਛਾਪਾ ਮਾਰਿਆ ਤਾਂ ਇਕ ਵਰਨਾ ਕਾਰ ਹਾਦਸਾਗ੍ਸਤ ਜਿਸ ਨੂੰ ਕਰੇਨ ਲੈ ਕੇ ਆ ਰਹੀ ਸੀ, ਨੂੰ ਪੁਲਿਸ ਪਾਰਟੀ ਚੈਕ ਕਰਨ ਲੱਗੀ ਤਾਂ ਇਕ ਵਿਅਕਤੀ ਮੌਕੇ ਤੋਂ ਭੱਜ ਗਿਆ ਜਦ ਕਿ ਦੂਸਰੇ ਵਿਅਕਤੀ ਨੂੰ ਪੁਲਿਸ ਪਾਰਟੀ ਨੇ ਘੇਰਾ ਪਾ ਕੇ ਗਿ੍ਫਤਾਰ ਕਰ ਲਿਆ ਤੇ ਜੱਦ ਹਾਦਸਾਗ੍ਸਤ ਗੱਡੀ ਦੀ ਤਲਾਸ਼ੀ ਲਈ ਤਾਂ ਗੱਡੀ ਵਿਚੋਂ ਦੋ ਬੋਰੀਆਂ ਭੁੱਕੀ ਚੂਰਾ ਪੋਸਤ ਬਰਾਮਦ ਹੋਈਆਂ। ਇਸ 'ਤੇ ਪੁਲਿਸ ਪਾਰਟੀ ਨੇ ਮਨਜਿੰਦਰ ਸਿੰਘ ਉਰਫ ਬੱਬੂ ਪੁੱਤਰ ਰਣਜੀਤ ਸਿੰਘ ਵਾਸੀ ਕੋਟਲੀ ਨੂੰ ਗਿ੍ਫਤਾਰ ਕਰ ਲਿਆ, ਜਦ ਕਿ ਫਰਾਰ ਸਾਥੀ ਬੂਟਾ ਸਿੰਘ ਪੁੱਤਰ ਗੁਰਦੇਵ ਸਿੰਘ ਵਾਸੀ ਭੈਣੀ ਗੁੱਜਰਾਂ ਦੀ ਤਲਾਸ਼ ਵਿਚ ਪੁਲਿਸ ਪਾਰਟੀ ਛਾਪਾਮਾਰੀ ਕਰ ਰਹੀਆਂ ਹਨ।

ਇਸੇ ਤਰ੍ਹਾਂ ਸੀਆਈਏ ਸਟਾਫ ਦੀ ਪੁਲਿਸ ਨੇ ਥਾਣਾ ਸੁਧਾਰ ਦੇ ਪਿੰਡ ਬੋਪਾਰਾਏ ਡਰੇਨ ਨੇੜੇ ਮੁਖਬਰ ਦੀ ਸੂਚਨਾ ਤੇ ਛਾਪਾ ਮਾਰ ਕੇ ਉਥੇ ਖੜ੍ਹੀ ਜੈਨ ਕਾਰ ਦੀ ਤਲਾਸ਼ੀ ਲਈ ਜਿਸ ਦੀ ਡਿੱਗੀ ਵਿਚ ਪਲਾਸਟਿਕ ਦੇ ਭੁੱਕੀ ਨਾਲ ਭਰੇ ਦੋ ਗੱਟੂ ਬਰਾਮਦ ਹੋਏ। ਇਸ ਛਾਪਾਮਾਰੀ ਦੌਰਾਨ ਪੁਲਿਸ ਪਾਰਟੀ ਨੇ ਪਰਮਜੀਤ ਕੁਮਾਰ ਪੁੱਤਰ ਛਤਰਪਾਲ ਵਾਸੀ ਤਲਵਣ ਨੂੰ ਗਿ੍ਫਤਾਰ ਕਰ ਲਿਆ, ਜਦ ਕਿ ਉਸ ਦਾ ਦੂਸਰਾ ਸਾਥੀ ਜਸਵਿੰਦਰ ਸਿੰਘ ਉਰਫ ਜੱਸਾ ਪੁੱਤਰ ਸੂਰਤ ਸਿੰਘ ਵਾਸੀ ਝੰਡਾ ਕਲਾਂ ਫ਼ਰਾਰ ਹੋ ਗਿਆ।

ਅਮਨਜੋਤ ਵਾਲੀਆ, ਕਪੂਰਥਲਾ : ਵਡਾਲਾ ਚੌਂਕੀ ਵਿਖੇ ਪੈਂਦੇ ਪੀਟੀਯੂ ਨੇੜੇ ਇਕ ਕਾਰ ਅਤੇ ਐਕਟਿਵਾ ਦੀ ਟੱਕਰ ਵਿਚ ਦੋ ਵਿਅਕਤੀ ਗੰਭੀਰ ਰੂਪ ਨਾਲ ਜ਼ਖ਼ਮੀ ਹੋ ਗਏ। ਹਸਪਤਾਲ ਵਿਖੇ ਜ਼ੇਰੇ ਇਲਾਜ ਗੁਰਵਿੰਦਰ ਸਿੰਘ ਪੁੱਤਰ ਕਰਨੈਲ ਸਿੰਘ ਅਤੇ ਨਰੇਸ਼ ਕੁਮਾਰ ਪੁੱਤਰ ਕੇਵਲ ਕ੍ਰਿਸ਼ਨ ਵਾਸੀ ਲੋਹੀਆ ਨੇ ਦੱਸਿਆ ਕਿ ਉਹ ਲੋਹੀਆਂ ਵਿਖੇ ਮੋਬਾਈਲ ਦੀ ਦੁਕਾਨ ਦਾ ਕੰਮ ਕਰਦੇ ਹਨ। ਉਹ ਆਪਣੇ ਮਾਲਕ ਨਰੇਸ਼ ਕੁਮਾਰ ਨਾਲ ਐਤਵਾਰ ਨੂੰ ਜਲੰਧਰ ਵਿਖੇ ਮੋਬਾਈਲਾਂ ਦਾ ਸਾਮਾਨ ਲੈਣ ਲਈ ਐਕਟਿਵਾ 'ਤੇ ਜਾ ਰਹੇ ਸਨ ਤਾਂ ਜਦੋਂ ਉਹ ਪੀਟੀਯੂ ਯੂਨੀਵਰਿਸਟੀ ਨੇੜੇ ਪਹੁੰਚੇ ਤਾਂ ਪਿਛੋਂ ਆਉਂਦੀ ਇਕ ਤੇਜ਼ ਰਫਤਾਰ ਅਣਪਛਾਤੀ ਕਾਰ ਨੇ ਉਨ੍ਹਾਂ ਨੂੰ ਟੱਕਰ ਮਾਰ ਦਿੱਤੀ ਜਿਸ ਕਾਰਨ ਉਹ ਗੰਭੀਰ ਰੂਪ ਨਾਲ ਜ਼ਖ਼ਮੀ ਹੋ ਗਏ। ਟੱਕਰ ਮਾਰਨ ਤੋਂ ਬਾਅਦ ਕਾਰ ਚਾਲਕ ਮੌਕੇ ਤੋਂ ਫਰਾਰ ਹੋ ਗਿਆ। ਜ਼ਖ਼ਮੀ ਹਾਲਤ ਵਿਚ ਉਨ੍ਹਾਂ ਨੂੰ ਰਾਹਗੀਰਾਂ ਦੀ ਸਹਾਇਤਾ ਨਾਲ ਕਪੂਰਥਲਾ ਦੇ ਸਿਵਲ ਹਸਪਤਾਲ ਵਿਚ ਦਾਖਲ ਕਰਵਾਇਆ ਗਿਆ। ਇਸ ਸਬੰਧੀ ਸਬੰਧਤ ਥਾਣੇ ਦੀ ਪੁਲਿਸ ਨੂੰ ਸੂਚਿਤ ਕਰ ਦਿੱਤਾ ਗਿਆ ਹੈ।

ਇਸੇ ਤਰ੍ਹਾਂ ਥਾਣਾ ਸਿਟੀ ਵਿਚ ਪੈਂਦੇ ਮੁਹੱਲਾ ਸ਼ੇਰਗੜ੍ਹ ਦੀ ਇਕ ਬਜ਼ੁਰਗ ਅੌਰਤ ਆਪਣੇ ਘਰ ਦੀ ਛੱਤ ਤੋਂ ਹੇਠਾਂ ਡਿੱਗ ਗਈ, ਜਿਸ ਕਾਰਨ ਉਹ ਗੰਭੀਰ ਜ਼ਖ਼ਮੀ ਹੋ ਗਈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਪੁਸ਼ਪਾ ਰਾਣੀ ਪਤਨੀ ਵਿਲੈਤੀ ਰਾਮ ਵਾਸੀ ਮੁਹੱਲਾ ਸ਼ੇਰਗੜ੍ਹ ਦੇ ਪਰਿਵਾਰਕ ਮੈਂਬਰਾਂ ਨੇ ਦੱਸਿਆ ਕਿ ਉਹ ਐਤਵਾਰ ਨੂੰ ਆਪਣੇ ਘਰ ਦਾ ਸਾਮਾਨ ਨਵੇਂ ਮਕਾਨ ਵਿਚ ਸ਼ਿਫਟ ਕਰ ਰਹੇ ਸਨ ਤਾਂ ਜਦੋਂ ਉਹ ਸਾਮਾਨ ਲੈਣ ਲਈ ਘਰ ਦੀ ਛੱਤ 'ਤੇ ਗਈ ਤਾਂ ਉਸ ਦਾ ਪੈਰ ਸਲਿਪ ਹੋ ਗਿਆ ਜਿਸ ਕਾਰਨ ਉਹ ਮੁੱਘ ਦੇ ਵਿਚੋਂ ਘਰ ਦੇ ਛੱਤ ਦੀ ਪਹਿਲੀ ਮੰਜ਼ਿਲ ਤੋਂ ਹੇਠਾਂ ਡਿੱਗ ਗਈ, ਜਿਸ ਕਾਰਨ ਉਹ ਗੰਭੀਰ ਰੂਪ ਨਾਲ ਜ਼ਖ਼ਮੀ ਹੋ ਗਈ। ਜ਼ਖ਼ਮੀ ਹਾਲਤ ਵਿਚ ਉਸ ਨੂੰ ਕਪੂਰਥਲਾ ਦੇ ਸਿਵਲ ਹਸਪਤਾਲ ਵਿਚ ਦਾਖ਼ਲ ਕਰਵਾਇਆ ਗਿਆ ਜਿੱਥੇ ਡਿਊਟੀ ਡਾ. ਮਨਪ੍ਰੀਤ ਨੇ ਉਸ ਦਾ ਮੁੱਢਲਾ ਇਲਾਜ਼ ਕਰਕੇ ਉਸ ਨੂੰ ਜਲੰਧਰ ਦੇ ਨਿੱਜੀ ਹਸਪਤਾਲ ਲਈ ਰੈਫਰ ਕਰ ਦਿੱਤਾ।

ਟਾਸ : ਭਾਰਤ (ਬੱਲੇਬਾਜ਼ੀ)

ਭਾਰਤ : 358/9 (50 ਓਵਰ)

ਰੋਹਿਤ ਕੈ. ਹੈਂਡਸਕੋਂਬ ਬੋ. ਰਿਚਰਡਸਨ 95, 92, 07, 02

ਸ਼ਿਖਰ ਧਵਨ ਬੋ. ਕਮਿਨਜ਼ 143, 115, 18, 03

ਰਾਹੁਲ ਕੈ. ਕੈਰੀ ਬੋ. ਜਾਂਪਾ 26, 31, 01, 00

ਕੋਹਲੀ ਕੈ. ਕੈਰੀ ਬੋ. ਰਿਚਰਡਸਨ 07, 06, 01, 00

ਰਿਸ਼ਭ ਪੰਤ ਕੈ. ਫਿੰਚ ਬੋ. ਕਮਿਨਜ਼ 36, 24, 04, 01

ਜਾਧਵ ਕੈ. ਰਿਚਰਡਸਨ ਬੋ. ਕਮਿਨਜ਼ 10, 12, 00, 00

ਵਿਜੈ ਸ਼ੰਕਰ ਕੈ. ਮੈਕਸਵੇਲ ਬੋ. ਕਮਿਨਜ਼ 26, 15, 01, 02

ਭੁਵਨੇਸ਼ਵਰ ਕੁਮਾਰ ਕੈ. ਕੈਰੀ ਬੋ. ਰਿਚਰਡਸਨ 01, 02, 00, 00

ਕੁਲਦੀਪ ਯਾਦਵ (ਅਜੇਤੂ) 01, 01, 00, 00

ਯੁਜਵੇਂਦਰਾ ਚਹਿਲ ਕੈ. ਤੇ ਬੋ. ਕਮਿਨਜ਼ 00, 01, 00, 00

ਜਸਪ੍ਰੀਤ ਬੁਮਰਾਹ (ਅਜੇਤੂ) 06, 01, 00, 01

ਵਾਧੂ : 7

ਕੁੱਲ : 50 ਓਵਰਾਂ 'ਚ ਨੌਂ ਵਿਕਟਾਂ 'ਤੇ 358 ਦੌੜਾਂ।

ਵਿਕਟ ਪਤਨ : 1-193 (ਰੋਹਿਤ, 30.6), 2-254 (ਧਵਨ, 37.4), 3-266 (ਕੋਹਲੀ, 39.4), 4-296 (ਰਾਹੁਲ, 42.6), 5-314 (ਪੰਤ, 45.3), 6-331 (ਜਾਧਵ, 47.6), 7-344 (ਭੁਵਨੇਸ਼ਵਰ, 48.6), 8-351 (ਸ਼ੰਕਰ, 49.3), 9-352 (ਚਹਿਲ, 49.5)

ਗੇਂਦਬਾਜ਼ੀ : ਪੈਟ ਕਮਿਨਜ਼ 10-0-70-5, ਜੇਸਨ ਬੇਹਰਨਡ੍ਰਾਫ 10-1-61-0, ਝੇਈ ਰਿਚਰਡਸਨ 9-0-85-3, ਗਲੇਨ ਮੈਕਸਵੈਲ 8-1-61-0, ਏਡਮ ਜਾਂਪਾ 10-0-57-1, ਆਰੋਨ ਫਿੰਚ 3-0-22-0

ਸੁਖਦੇਵ ਸਿੰਘ, ਲੁਧਿਆਣਾ

ਸਰਕਾਰੀ ਕਾਲਜ ਲੜਕੀਆਂ ਲੁਧਿਆਣਾ ਵਿਖੇ ਸ਼੍ਰੀ ਗੁਰੂ ਨਾਨਕ ਦੇਵ ਜੀ ਦੀ 550ਵੇਂ ਗੁਰਪੁਰਬ ਨੂੰ ਸਮਰਪਿਤ ਅੰਤਰ ਕਾਲਜ ਮੁਕਾਬਲੇ ਕਰਵਾਏ ਗਏ। ਵੱਖ-ਵੱਖ ਮੁਕਾਬਲਿਆਂ 'ਚ ਕ੍ਰਿਏਟਿਵ ਰਾਈਟਿੰਗ, ਡਿਬੇਟ ਮੁਕਾਬਲਾ, ਕਵਿਤਾ ਉਚਾਰਨ, ਹੈਰੀਟੇਜ ਆਈਟਮਜ਼ ਮੁਕਾਬਲਾ, ਫਾਈਨ ਆਰਟਸ, ਸਾਇੰਸ, ਆਈਟੀ, ਬਿਜ਼ਨਸ ਤੇ ਸੰਗੀਤ ਮੁਕਾਬਲੇ ਨਾਲ ਸਬੰਧਤ ਮੁਕਾਬਲੇ ਸ਼ਾਮਲ ਸਨ। ਇਸ ਮੌਕੇ ਯੂਥ ਵੈਲਫੇਅਰ ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਦੇ ਡਾਇਰੈਕਟਰ ਡਾ. ਨਿਰਮਲ ਜੌੜਾ ਨੇ ਮੁੱਖ ਮਹਿਮਾਨ ਵਜੋਂ ਹਾਜ਼ਰੀ ਲਵਾਈ। ਨਿਰਮਲ ਜੌੜਾ ਤੇ ਪਿ੍ੰ. ਸਵਿਤਾ ਰਾਣੀ ਸ਼ਰਮਾ ਨੇ ਜੇਤੂਆਂ ਨੂੰ ਇਨਾਮ ਵੰਡੇ ਤੇ ਵਿਦਿਆਰਥੀਆਂ ਨੂੰ ਵਧਾਈ ਦਿੱਤੀ। ਉਨ੍ਹਾਂ ਕਿਹਾ ਕਿ ਅਜਿਹੀਆਂ ਸਰਗਰਮੀਆਂ ਵਿਦਿਆਰਥੀਆਂ ਦੇ ਸਰਬਪੱਖੀ ਵਿਕਾਸ 'ਚ ਮਦਦ ਕਰਦੀਆਂ ਹਨ। ਡਾ. ਨਿਰਮਲ ਜੌੜਾ ਨੇ ਵਿਦਿਆਰਥੀਆਂ ਨੂੰ ਉਤਸ਼ਾਹ ਤੇ ਜੋਸ਼ ਨਾਲ ਅਜਿਹੀਆਂ ਗਤੀਵਿਧੀਆਂ 'ਚ ਹਿੱਸਾ ਲੈਣ ਲਈ ਪ੍ਰੇਰਿਤ ਕੀਤਾ।ਕੁੱਲ ਮਿਲਾ ਕੇ ਰਨਰਅੱਪ ਟਰਾਫੀ ਸਰਕਾਰੀ ਕਾਲਜ ਦੀਆਂ ਕੁੜੀਆਂ ਨੇ ਜਿੱਤੀ।

-ਵੱਖ-ਵੱਖ ਮੁਕਾਬਲਿਆਂ ਦੇ ਨਤੀਜੇ ਇਸ ਤਰ੍ਹਾਂ ਰਹੇ :

ਪੋਸਟਰ ਮੇਕਿੰਗ-

ਪਹਿਲਾ ਇਨਾਮ: ਨੀਰਜ ਸ਼ਰਮਾ, ਜੀਸੀਜੀ ਲੁਧਿਆਣਾ

ਫਾਈਲ ਬਣਾਉਣਾ-

ਪਹਿਲਾ ਇਨਾਮ : ਪੂਰਬੀ ਹਾਂਡਾ, ਜੀਐੱਨਕੇਸੀ ਲੁਧਿਆਣਾ

ਅਜੇ ਵੀ ਜ਼ਿੰਦਗੀ--

ਪਹਿਲਾ ਇਨਾਮ: ਮਨਮਿੰਦਰ ਕੌਰ, ਖਾਲਸਾ ਕਾਲਜ ਲੁਧਿਆਣਾ

ਰੰਗੋਲੀ ਮੁਕਾਬਲਾ-

ਪਹਿਲਾ ਇਨਾਮ : ਖਾਲਸਾ ਕਾਲਜ ਲੁਧਿਆਣਾ

ਵੈਬਸਾਈਟ ਡਿਜ਼ਾਈਨਿੰਗ-

ਪਹਿਲਾ ਇਨਾਮ : ਜੀਜੀਐੱਨ ਖਾਲਸਾ ਕਾਲਜ ਲੁਧਿਆਣਾ

ਵੀਡੀਓਗ੍ਰਾਫੀ

ਪਹਿਲਾ ਇਨਾਮ : ਜੀਸੀਜੀ ਲੁਧਿਆਣਾ

ਬਹਿਸ ਮੁਕਾਬਲਾ-

ਪਹਿਲਾ ਇਨਾਮ : ਜੀਸੀਜੀ ਲੁਧਿਆਣਾ ਅਤੇ ਐੱਸਸੀਡੀ ਸਰਕਾਰੀ ਕਾਲਜ ਲੁਧਿਆਣਾ

ਬਾਲਣ ਬਿਨਾ ਖਾਣਾ-

ਪਹਿਲਾ ਇਨਾਮ : ਸਵਾਮੀ ਗੰਗਾ ਗਿਰੀ ਜਨਤਾ ਕਾਲਜ ਰਾਏਕੋਟ

ਕਾਰੋਬਾਰੀ ਯੋਜਨਾ-

ਪਹਿਲਾ ਇਨਾਮ : ਗੁਰੂ ਨਾਨਕ ਖਾਲਸਾ ਕਾਲਜ ਫਾਰ ਵਿਮੈਨ ਲੁਧਿਆਣਾ

ਗਜ਼ਲ-

ਪਹਿਲਾ ਇਨਾਮ : ਰਾਮਗੜ੍ਹੀਆ ਗਰਲਜ਼ ਕਾਲਜ ਲੁਧਿਆਣਾ

ਸੋਲੋ ਡਾਂਸ-

ਪਹਿਲਾ ਇਨਾਮ : ਜੀਸੀਜੀ ਲੁਧਿਆਣਾ

ਮੁਹਾਵਰੇ ਮੁਕਾਬਲਾ --

ਪਹਿਲਾ ਇਨਾਮ : ਬੀਸੀਐੱਮ ਕਾਲਜ ਆਫ਼ ਐਜੂਕੇਸ਼ਨ

ਲੇਖ ਲਿਖੋ-

ਪਹਿਲਾ ਇਨਾਮ : ਸ਼੍ਰੀ ਅਰਬਿੰਦੋ ਕਾਲਜ ਆਫ਼ ਕਾਮਰਸ ਐਂਡ ਮੈਨੇਜਮੈਂਟ

ਕਵਿਤਾ ਲਿਖਣਾ-

ਪਹਿਲਾ ਇਨਾਮ : ਸਨਮਤੀ ਸਰਕਾਰ ਸਾਇੰਸ ਤੇ ਖੋਜ ਕਾਲਜ ਜਗਰਾਓਂ

ਈਨੂੰ ਮੇਕਿੰਗ-

ਪਹਿਲਾ ਇਨਾਮ : ਜੀਸੀਜੀ ਲੁਧਿਆਣਾ

ਨਾਲਾ ਬਣਾਉਣਾ-

ਪਹਿਲਾ ਇਨਾਮ : ਗੁਰੂ ਨਾਨਕ ਖਾਲਸਾ ਕਾਲਜ ਫਾਰ ਵੋਮੈਨ ਲੁਧਿਆਣਾ

ਖਿੱਦੋ ਬਣਾਉਣਾ-

ਪਹਿਲਾ ਇਨਾਮ : ਜੀਸੀਜੀ ਲੁਧਿਆਣਾ

ਮਹਿੰਦੀ ਮੁਕਾਬਲੇ-

ਪਹਿਲਾ ਇਨਾਮ : ਗੁਰੂ ਨਾਨਕ ਖਾਲਸਾ ਕਾਲਜ ਫਾਰ ਵਿਮੈਨ ਲੁਧਿਆਣਾ

ਕਰੋਚੈਟ-

ਪਹਿਲਾ ਇਨਾਮ : ਜੀਸੀਜੀ ਲੁਧਿਆਣਾ।

ਜੇਐੱਨਐੱਨ, ਲੁਧਿਆਣਾ : ਢੰਡਾਰੀ ਖੁਰਦ ਦੁਰਗਾ ਕਾਲੋਨੀ ਰੋਡ 'ਤੇ ਤੇਜ਼ ਰਫ਼ਤਾਰ ਟਰੱਕ ਹੇਠਾਂ ਆਉਣ ਨਾਲ 12ਵੀਂ ਦੇ ਵਿਦਿਆਰਥੀ ਦੀ ਮੌਤ ਹੋ ਗਈ। ਜਦਕਿ ਉਸ ਦੇ ਦੋਸਤ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ। ਡਰਾਈਵਰ ਟਰੱਕ ਨੂੰ ਮੌਕੇ ਤੋਂ ਭਜਾ ਕੇ ਲੈ ਗਿਆ ਸੀ, ਪੁਲਿਸ ਨੇ ਜਾਂਚ ਤੋਂ ਬਾਅਦ ਟਰੱਕ ਤੇ ਉਸ ਦੇ ਡਰਾਈਵਰ ਨੂੰ ਹਿਰਾਸਤ 'ਚ ਲੈ ਲਿਆ ਹੈ ਤੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

ਜਾਣਕਾਰੀ ਅਨੁਸਾਰ ਵਾਰਦਾਤ ਵੇਲੇ ਦੁਪਹਿਰੇ 12 ਵਜੇ ਰਾਜ ਸਿੰਘ ਰਾਜਪੂਤ ਬਾਈਕ 'ਤੇ ਸਵਾਰ ਹੋ ਕੇ ਜਾ ਰਿਹਾ ਸੀ ਤੇ ਉਸ ਦਾ ਦੋਸਤ 21 ਸਾਲਾ ਅੰਕਿਤ ਉਪਾਧਿਆਏ ਪਿੱਛੇ ਬੈਠਾ ਹੋਇਆ ਸੀ। ਜਿਵੇਂ ਹੀ ਉਹ ਦੁਰਗਾ ਕਾਲੋਨੀ ਰੋਡ 'ਤੇ ਪੁੱਜਾ ਤਾਂ ਪਿੱਛੇ ਤੋਂ ਆ ਰਹੇ ਟਰੱਕ ਦੇ ਡਰਾਈਵਰ ਨੇ ਉਨ੍ਹਾਂ ਨੂੰ ਫੇਟ ਮਾਰ ਦਿੱਤੀ ਤੇ ਬਾਈਕ ਦਾ ਸੰਤੁਲਨ ਵਿਗੜ ਗਿਆ ਤੇ ਬਾਈਕ ਹੇਠਾਂ ਡਿੱਗ ਪਈ, ਦੋਵੇਂ ਦੋਸਤ ਸੜਕ 'ਤੇ ਡਿੱਗ ਪਏ ਤੇ ਟਰੱਕ ਦਾ ਪਿਛਲਾ ਟਾਇਰ ਅੰਕਿਤ 'ਤੇ ਚੜ੍ਹ ਗਿਆ ਤੇ ਡਰਾਈਵਰ ਟਰੱਕ ਲੈ ਕੇ ਫ਼ਰਾਰ ਹੋ ਗਿਆ। ਇਸੇ ਦੌਰਾਨ ਉੱਥੇ ਲੋਕ ਇਕੱਠੇ ਹੋਏ ਤੇ ਰੋਸ ਪ੍ਗਟਾਉਣ ਲੱਗੇ। ਇਸ ਤੋਂ ਬਾਅਦ ਲਾਸ਼ ਨੂੰ ਸਿਵਲ ਹਸਪਤਾਲ ਪਹੰੁਚਾਇਆ ਗਿਆ। ਥਾਣਾ ਫੋਕਲ ਪੁਆਇੰਟ ਦੇ ਐੱਸਐੱਚਓ ਗੁਰਵਿੰਦਰ ਸਿੰਘ, ਢੰਡਾਰੀ ਚੌਕੀ ਦੀ ਪੁਲਿਸ ਸਮੇਤ ਮੌਕੇ 'ਤੇ ਪੁੱਜੇ। ਲੋਕਾਂ ਨੇ ਐਲਾਨ ਕੀਤਾ ਕਿ ਜਦੋਂ ਤਕ ਟਰੱਕ ਦਾ ਡਰਾਈਵਰ ਨਹੀਂ ਫੜਿਆ ਜਾਂਦਾ, ਤਾਂ ਲਾਸ਼ ਦਾ ਸਸਕਾਰ ਨਹੀਂ ਕੀਤਾ ਜਾਵੇਗਾ।

ਇਸ ਤੋਂ ਬਾਅਦ ਪੁਲਿਸ ਨੇ ਜਾਂਚ ਸ਼ੁਰੂ ਕੀਤੀ, ਤਾਂ ਪਤਾ ਲੱਗਿਆ ਕਿ ਟਰੱਕ ਦੁਰਗਾ ਕਾਲੋਨੀ 'ਚ ਕੀਤੀ ਰੋਲਿੰਗ ਮਿੱਲ ਦੀ ਫੈਕਟਰੀ ਦਾ ਸੀ। ਪੁਲਿਸ ਜਿਵੇਂ ਹੀ ਉੱਥੇ ਪੁੱਜੀ, ਤਾਂ ਫੈਕਟਰੀ ਦੇ ਸਕਿਓਰਿਟੀ ਗਾਰਡ ਨੇ ਟਰੱਕ ਸਬੰਧੀ ਜਾਣਕਾਰੀ ਦੇਣ ਤੋਂ ਮਨ੍ਹਾਂ ਕਰ ਦਿੱਤਾ। ਪੁਲਿਸ ਨੂੰ ਜਾਂਚ ਤੋਂ ਬਾਅਦ ਪਤਾ ਲੱਗਾ ਕਿ ਟਰੱਕ ਇਸੇ ਫੈਕਟਰੀ 'ਚੋਂ ਬਰਾਮਦ ਹੋਇਆ ਹੈ। ਟਰੱਕ ਦੇ ਪਿਛਲੇ ਟਾਇਰ 'ਤੇ ਖ਼ੂਨ ਵੀ ਲੱਗਿਆ ਹੋਇਆ ਸੀ। ਪੁਲਿਸ ਨੇ ਇੱਥੋਂ ਟਰੱਕ ਤੇ ਇਸ ਦੇ ਡਰਾਈਵਰ ਨੂੰ ਹਿਰਾਸਤ 'ਚ ਲੈ ਲਿਆ ਹੈ। ਲੋਕਾਂ ਵੱਲੋਂ ਫੈਕਟਰੀ ਦੇ ਬਾਹਰ ਵੀ ਰੋਸ ਪ੍ਗਟਾਇਆ ਗਿਆ ਹੈ। ਲੋਕਾਂ ਨੇ ਕਿਹਾ ਕਿ ਫੈਕਟਰੀ ਸੰਚਾਲਕਾਂ ਵੱਲੋਂ ਟਰੱਕ 'ਚੋਂ ਸਬੂਤ ਮਿਟਾਉਣ ਦੀ ਵੀ ਕੋਸ਼ਿਸ਼ ਕੀਤੀ ਗਈ ਹੈ।

ਅੰਕਿਤ ਉਪਾਧਿਆਏ ਮੂਲ ਤੌਰ 'ਤੇ ਗੋਰਖਪੁਰ ਦੇ ਜ਼ਿਲ੍ਹਾ ਕੁਸ਼ੀ ਨਗਰ ਪਿੰਡ ਮਨਸੂਰ ਗੰਜ ਦਾ ਰਹਿਣ ਵਾਲਾ ਸੀ। ਮਿ੍ਤਕ ਦੇ ਜੀਜਾ ਸਚਿਦਾਨੰਦ ਤਿ੍ਪਾਠੀ ਨੇ ਦੱਸਿਆ ਕਿ ਅੰਕਿਤ ਦੇ ਨਾਨਾ ਦੀ ਮੌਤ ਹੋ ਗਈ ਸੀ। ਜਿਸ ਤੋਂ ਬਾਅਦ ਉਸ ਦੇ ਮੰਮੀ-ਪਾਪਾ ਪਿੰਡ ਗਏ ਹੋਏ ਹਨ। ਮਿ੍ਤਕ ਅੰਕਿਤ ਉਪਾਧਿਆਏ ਦੇ ਪੇਪਰ ਹੋਣ ਕਾਰਨ ਉਹ ਇੱਥੇ ਹੀ ਸੀ। ਉਸ ਦੇ ਪਿਤਾ ਵਰੁਣਨੇਂਦਰ ਉਪਾਧਿਆਏ ਸ਼ਹਿਰ 'ਚ ਕੰਮ ਕਰਦੇ ਹਨ ਤੇ ਉਹ ਦੋ ਭਰਾਵਾਂ 'ਚੋਂ ਸਭ ਤੋਂ ਛੋਟਾ ਭਰਾ ਸੀ।

ਪੱਤਰ ਪ੍ਰੇਰਕ, ਲੁਧਿਆਣਾ : ਨਿਸ਼ਕਾਮ ਨਾਮ ਸਿਮਰਨ ਸੇਵਾ ਸੁਸਾਇਟੀ ਵੱਲੋਂ ਗੁਰਦੁਆਰਾ ਸ੍ਰੀ ਗੁਰੂ ਸਿੰਘ ਸਭਾ ਮਾਡਲ ਟਾਊਨ ਐਕਸਟੈਂਸ਼ਨ ਵਿਖੇ ਕਰਵਾਏ ਗਏ ਹਫ਼ਤਾਵਾਰੀ ਸਮਾਗਮ ਅੰਦਰ ਗੁਰੂ ਘਰ ਦੇ ਕੀਰਤਨੀਏ ਭਾਈ ਦਲਬੀਰ ਸਿੰਘ ਹਜ਼ੂਰੀ ਰਾਗੀ ਸੱਚਖੰਡ ਸ੍ਰੀ ਦਰਬਾਰ ਸਾਹਿਬ ਵਾਲਿਆਂ ਦੇ ਜੱਥੇ ਨੇ ਗੁਰਬਾਣੀ ਕੀਰਤਨ ਰਾਹੀਂ ਸੰਗਤ ਨੂੰ ਨਿਹਾਲ ਕੀਤਾ। ਭਾਈ ਦਲਬੀਰ ਸਿੰਘ ਨੇ ਕੀਰਤਨ ਕਰਦਿਆਂ ਕਿਹਾ ਕਿ ਸ੍ਰੀ ਗੁਰੂ ਗ੍ੰਥ ਸਾਹਿਬ ਜੀ ਦੀ ਇਲਾਹੀ ਬਾਣੀ ਮਨੁੱਖ ਨੂੰ ਮਨੁੱਖ ਨਾਲ ਜੋੜਦੀ ਹੈ ਅਤੇ ਦੁਨੀਆਂ ਭਰ ਦੇ ਲੋਕਾਂ ਨੂੰ ਇਹ ਸੁਨੇਹਾ ਦਿੰਦੀ ਹੈ ਕਿ ਪ੍ਮਾਤਮਾ ਇਕ ਹੈ। ਸਮਾਗਮ ਦੀ ਸਮਾਪਤੀ 'ਤੇ ਨਿਸ਼ਕਾਮ ਨਾਮ ਸਿਮਰਨ ਸੇਵਾ ਸੁਸਾਇਟੀ ਦੇ ਮੁੱਖ ਸੇਵਾਦਾਰ ਭੁਪਿੰਦਰ ਸਿੰਘ ਤੇ ਉਨ੍ਹਾਂ ਦੇ ਸਾਥੀ ਮੈਂਬਰਾਂ ਨੇ ਸਾਂਝੇ ਰੂਪ 'ਚ ਕੀਰਤਨੀ ਜੱਥੇ ਦੇ ਮੈਂਬਰਾਂ ਨੂੰ ਸਿਰੋਪਾਓ ਬਖ਼ਸ਼ਿਸ਼ ਕਰ ਕੇ ਉਨ੍ਹਾਂ ਦਾ ਧੰਨਵਾਦ ਕੀਤਾ। ਅਗਲੇ ਹਫ਼ਤੇ ਦੇ ਕੀਰਤਨੀ ਸਮਾਗਮ 'ਚ ਭਾਈ ਸੁਖਦੇਵ ਸਿੰਘ, ਭਾਈ ਲਖਵਿੰਦਰ ਸਿੰਘ ਹਜ਼ੂਰੀ ਰਾਗੀ ਪੰਜੋਖਰਾ ਸਾਹਿਬ ਵਾਲਿਆ ਦਾ ਕੀਰਤਨੀ ਜੱਥਾ ਹਾਜ਼ਰੀ ਭਰ ਕੇ ਸੰਗਤ ਨੂੰ ਨਿਹਾਲ ਕਰਨਗੇ।

ਕੀਰਤਨ ਸਮਾਗਮ ਅੰਦਰ ਸਟੇਜ ਸਕੱਤਰ ਦੀ ਸੇਵਾ ਕਿ੍ਪਾਲ ਸਿੰਘ ਚੌਹਾਨ ਨੇ ਨਿਭਾਈ। ਕੀਰਤਨ ਸਮਾਗਮ 'ਚ ਇੰਦਰਜੀਤ ਸਿੰਘ ਮੱਕੜ, ਜਤਿੰਦਰਪਾਲ ਸਿੰਘ ਸਲੂਜਾ, ਕਰਨੈਲ ਸਿੰਘ ਬੇਦੀ, ਬਲਬੀਰ ਸਿੰਘ ਭਾਟੀਆ, ਪਿ੍ਤਪਾਲ ਸਿੰਘ, ਏਪੀ ਸਿੰਘ ਅਰੋੜਾ, ਗਿਆਨ ਸਿੰਘ, ਗੁਰਬਚਨ ਸਿੰਘ ਵਸੀਰ, ਐੱਸਪੀ. ਸਿੰਘ ਮਲਹੋਤਰਾ, ਜਸਪ੍ਰੀਤ ਸਿੰਘ ਕੋਹਲੀ, ਹਰਭਜਨ ਸਿੰਘ, ਗਰੁਦੀਪ ਸਿੰਘ, ਮਨਜੀਤ ਸਿੰਘ, ਗੁਰਪ੍ਰੀਤ ਸਿੰਘ, ਸੁਖਪ੍ਰੀਤ ਸਿੰਘ, ਬਾਦਸ਼ਾਹਦੀਪ ਸਿੰਘ, ਮਨਮੋਹਨ ਸਿੰਘ ਵਾਲੀਆ, ਨਵਜੌਤ ਸਿੰਘ, ਬਿਕਰਮਜੀਤ ਸਿੰਘ ਮੱਕੜ, ਸਹਿਜ ਮੱਕੜ, ਅਮਰਜੀਤ ਸਿੰਘ ਨਨਕਾਣਾ ਸਾਹਿਬ, ਜਗਦੇਵ ਸਿੰਘ ਕਲਸੀ, ਅਤਰ ਸਿੰਘ, ਜਗਜੀਤ ਸਿੰਘ ਆਹੂਜਾ, ਅਜੀਤ ਸਿੰਘ ਆੜਤੀ, ਗੁਰਵਿੰਦਰ ਸਿੰਘ, ਗੁਰਦੀਪ ਸਿੰਘ ਰੰਧਾਵਾ, ਰਜਿੰਦਰ ਸਿੰਘ, ਹਰਚਰਨ ਸਿੰਘ ਕਾਲੜਾ, ਸੇਵਾ ਸਿੰਘ ਭੱਟੀ ਤੇ ਕਿਰਨਦੀਪ ਸਿੰਘ ਸਿਮਰਨ ਵਿਸ਼ੇਸ ਤੌਰ 'ਤੇ ਹਾਜ਼ਰ ਸਨ।

ਜੇਐੱਨਐੱਨ, ਲੁਧਿਆਣਾ : ਸ਼ਹਿਰ ਦੇ ਸ਼ਿਮਲਾਪੁਰੀ ਦੇ ਹਰਕ੍ਰਿਸ਼ਨ ਨਗਰ ਦੇ ਵਿਅਕਤੀ ਨੇ ਪੁਲਿਸ ਤੇ ਸਹੁਰਿਆਂ ਤੋਂ ਤੰਗ ਆ ਕੇ ਜ਼ਹਿਰੀਲੀ ਚੀਜ਼ ਨਿਗਲ ਕੇ ਖ਼ੁਦਕੁਸ਼ੀ ਕਰ ਲਈ। ਉਸ ਨੂੰ ਗੰਭੀਰ ਹਾਲਤ 'ਚ ਸਿਵਲ ਹਸਪਤਾਲ 'ਚ ਦਾਖ਼ਲ ਕਰਵਾਇਆ ਗਿਆ ਹੈ, ਇੱਥੇ ਉਸ ਦੀ ਹਾਲਤ ਗੰਭੀਰ ਬਣੀ ਹੋਈ ਹੈ।

ਸ਼ਿਮਲਾਪੁਰੀ ਨਿਵਾਸੀ ਜਸਪਾਲ ਸਿੰਘ ਦੇ ਜੀਜਾ ਪਰਮਿੰਦਰ ਸਿੰਘ ਨੇ ਦੱਸਿਆ ਕਿ ਉਸ ਦੇ ਸਾਲੇ ਦਾ ਵਿਆਹ ਛੇ ਸਾਲ ਪਹਿਲਾਂ ਦਸਮੇਸ਼ ਨਗਰ ਦੀ ਲੜਕੀ ਨਾਲ ਹੋਇਆ ਸੀ। ਵਿਆਹ ਤੋਂ ਬਾਅਦ ਹੀ ਦੋਵਾਂ 'ਚ ਅਣਬਣ ਚੱਲ ਰਹੀ ਸੀ। ਪਤਨੀ ਨੇ ਇਸ ਦੀ ਸ਼ਿਕਾਇਤ ਥਾਣੇ 'ਚ ਕਰਨ ਤੋਂ ਬਾਅਦ ਅਦਾਲਤ 'ਚ ਕੇਸ ਵੀ ਕੀਤਾ ਸੀ। ਪਰ ਪੰਚਾਇਤੀ ਰਾਜ਼ੀਨਾਮੇ ਤੋਂ ਬਾਅਦ ਉਹ ਫਿਰ ਤੋਂ ਇਕੱਠਾ ਰਹਿਣ ਲੱਗੇ ਸਨ। ਜਸਪਾਲ ਦੀ ਪਤਨੀ ਨੇ ਫਿਰ ਤੋਂ ਸ਼ਿਕਾਇਤ ਪੁਲਿਸ ਨੂੰ ਦਿੱਤੀ ਸੀ। ਥਾਣਾ ਸ਼ਿਮਲਾਪੁਰੀ ਤੋਂ ਏਐੱਸਆਈ ਨੇ ਜਸਪਾਲ ਨੂੰ ਸ਼ਨਿਚਰਵਾਰ ਦੇ ਦਿਨ ਥਾਣੇ ਬੁਲਾਇਆ ਸੀ। ਇੱਥੇ ਪੁਲਿਸ ਵਾਲਿਆਂ ਤੇ ਕਾਂਗਰਸੀ ਆਗੂ ਵੱਲੋਂ ਉਨ੍ਹਾਂ ਨੂੰ ਧਮਕਾਇਆ ਗਿਆ ਸੀ। ਜਸਪਾਲ ਨੂੰ ਫਿਰ ਤੋਂ ਸੋਮਵਾਰ ਨੂੰ ਥਾਣੇ ਬੁਲਾਇਆ ਗਿਆ ਸੀ। ਜੀਜਾ ਨੇ ਦੋਸ਼ ਲਗਾਇਆ ਕਿ ਕਾਂਗਰਸੀ ਆਗੂ ਵੱਲੋਂ ਥਾਣੇ 'ਚ ਉਸ ਨੂੰ ਬੁਰੀ ਤਰ੍ਹਾਂ ਬੇਇੱਜ਼ਤ ਕੀਤਾ ਗਿਆ ਸੀ ਤੇ ਮਾਂ-ਭੈਣ ਦੀਆਂ ਗਾਲ਼ਾਂ ਦਿੱਤੀਆਂ ਗਈਆਂ ਸਨ। ਜਿਸ ਤੋਂ ਆਹਤ ਹੋ ਕੇ ਜਸਪਾਲ ਨੇ ਘਰ 'ਤੇ ਹੀ ਜ਼ਹਿਰੀਲੀ ਦਵਾਈ ਨਿਗਲ ਲਈ। ਘਰ 'ਤੇ ਜਸਪਾਲ ਦੀ ਮਾਂ ਸੀ, ਜਿਸ ਨੇ ਇਸ ਦੀ ਸੂਚਨਾ ਉਨ੍ਹਾਂ ਨੂੰ ਦਿੱਤੀ ਤੇ ਉਹ ਉਸ ਨੂੰ ਹਸਪਤਾਲ ਲੈ ਆਏ।

ਇਸ ਸਬੰਧੀ ਥਾਣਾ ਸ਼ਿਮਲਾਪੁਰੀ ਦੇ ਮੁਖੀ ਇੰਸਪੈਕਟਰ ਪ੍ਮੋਦ ਕੁਮਾਰ ਨੇ ਕਿਹਾ ਕਿ ਦਬਾਅ ਵਾਲੀ ਕੋਈ ਗੱਲ ਨਹੀਂ ਹੈ। ਦੋਵਾਂ ਧਿਰਾਂ ਦੇ ਰਾਜ਼ੀਨਾਮੇ ਲਈ ਬਿਠਾਇਆ ਸੀ। ਸ਼ਨਿਚਰਵਾਰ ਨੂੰ ਦੋਵਾਂ 'ਚ ਰਾਜ਼ੀਨਾਮਾ ਹੋ ਵੀ ਗਿਆ ਸੀ ਤੇ ਸੋਮਵਾਰ ਨੂੰ ਇਸ ਨੂੰ ਫਾਈਨਲ ਕਰਨਾ ਸੀ। ਨੌਜਵਾਨ ਐਤਵਾਰ ਨੂੰ ਵੀ ਥਾਣੇ ਆਇਆ ਸੀ ਤੇ ਅੱਗੇ ਹੋਰ ਸਮਾਂ ਮੰਗ ਰਿਹਾ ਸੀ।

ਸਮੇਂ ਦੇ ਰੁਝਾਨ ਅਨੁਸਾਰ ਜ਼ਿਆਦਾਤਰ ਪੜ੍ਹੇ-ਲਿਖੇ ਲੋਕ ਹਰ ਰੋਜ਼ ਆਪਣੇ ਮੋਬਾਈਲਾਂ 'ਤੇ ਆਪੋ-ਆਪਣਾ ਸਟੇਟਸ ਪਾਉਂਦੇ ਰਹਿੰਦੇ ਹਨ। ਉਨ੍ਹਾਂ ਲੋਕਾਂ ਦੀ ਇਹ ਧਾਰਣਾ ਹੁੰਦੀ ਹੈ ਕਿ ਉਨ੍ਹਾਂ ਦੇ ਸੱਜਣਾਂ ਮਿੱਤਰਾਂ ਤੇ ਜਾਣਕਾਰਾਂ ਉੱਤੇ ਉਨ੍ਹਾਂ ਦਾ ਪ੍ਰਭਾਵ ਬਣਿਆ ਰਹੇ। ਫੇਸਬੁੱਕ ਦਾ ਪੇਜ ਬਣਾ ਕੇ ਉਸ ਉੱਤੇ ਆਪਣੇ ਆਪ ਨੂੰ ਪੇਸ਼ ਕਰਨਾ ਵੀ ਜ਼ਿੰਦਗੀ ਦਾ ਅਹਿਮ ਹਿੱਸਾ ਬਣਦਾ ਜਾ ਰਿਹਾ ਹੈ ਪਰ ਜ਼ਿੰਦਗੀ ਦੀ ਅਸਲ ਫੇਸਬੁੱਕ ਜਿਸ ਨੇ ਮਨੁੱਖ ਦੇ ਚੰਗੇ ਮਾੜੇ ਹੋਣ ਦਾ ਫ਼ੈਸਲਾ ਕਰਨਾ ਹੁੰਦਾ ਹੈ, ਉਸ ਤੋਂ ਲੋਕ ਦੂਰ ਹੁੰਦੇ ਜਾ ਰਹੇ ਹਨ।

ਕੁਝ ਸਾਲ ਪਹਿਲਾਂ ਸਾਡੇ ਸ਼ਹਿਰ ਦੇ ਇਕ ਹਰਮਨ ਪਿਆਰੇ ਦਰਵੇਸ਼ ਸੱਜਣ ਨੇ ਇਸ ਫਾਨੀ ਦੁਨੀਆ ਤੋਂ ਅਲਵਿਦਾ ਲਈ। ਉਸ ਨੂੰ ਆਖਰੀ ਸਲਾਮ ਕਹਿਣ ਲਈ ਸ਼ਮਸ਼ਾਨਘਾਟ 'ਤੇ ਲੋਕਾਂ ਦਾ ਬਹੁਤ ਵੱਡਾ ਹਜੂਮ ਇਹ ਕਹਿ ਰਿਹਾ ਸੀ ਕਿ ਉਸ ਦੇ ਇਸ ਦੁਨੀਆ ਤੋਂ ਤੁਰ ਜਾਣ ਦਾ ਦੁੱਖ ਉਸ ਦੇ ਇਕੱਲੇ ਪਰਿਵਾਰ ਨੂੰ ਹੀ ਨਹੀਂ ਸਗੋਂ ਪੂਰੀ ਖ਼ਲਕਤ ਨੂੰ ਵੀ ਹੈ। ਉਸ ਨੇ ਸਵਾਰਥ ਤੇ ਪਰਮਾਰਥ ਨੂੰ ਇਕ ਸੂਝਵਾਨ ਵਿਅਕਤੀ ਵਾਂਗ ਨਿਭਾਉਂਦਿਆਂ ਲੋਕਾਂ ਨੂੰ ਇਹ ਦੱਸਿਆ ਕਿ ਜ਼ਿੰਦਗੀ ਦੀ ਅਸਲ ਫੇਸਬੁੱਕ ਦੀ ਤਸਵੀਰ ਕਿਹੋ ਜਿਹੀ ਹੋਣੀ ਚਾਹੀਦੀ ਹੈ। ਉਹ ਸਿਆਸਤਦਾਨ ਹੋਣ ਦੇ ਨਾਤੇ ਇਕ ਪਾਰਟੀ ਨਾਲ ਜੁੜੇ ਹੋਣ ਦੇ ਬਾਵਜੂਦ ਸਾਂਝਾ -ਮਾਂਝਾ ਵਿਅਕਤੀ ਸੀ। ਉਹ ਆਪਣੇ ਸ਼ਹਿਰ ਦੀ ਨਗਰ ਕੌਂਸਲ ਦੀ ਚੋਣ ਕਦੇ ਨਹੀਂ ਸੀ ਹਾਰਿਆ ਤੇ ਉਸ ਦੀ ਜ਼ਿੰਦਗੀ ਦੀ ਚਿੱਟੀ ਚਾਦਰ 'ਤੇ ਭ੍ਰਿਸ਼ਟਾਚਾਰ ਦਾ ਇਕ ਵੀ ਦਾਗ਼ ਨਹੀਂ ਸੀ। ਉਹ ਚੋਣ ਲੜਦਾ ਨਹੀਂ ਸੀ ਸਗੋਂ ਉਸ ਦੇ ਵੋਟਰ ਉਸ ਨੂੰ ਚੋਣ ਲੜਵਾਉਂਦੇ ਸਨ। ਉਸ ਦੀ ਸ਼ਖਸੀਅਤ ਇਸ ਲਈ ਇਸ ਤਰ੍ਹਾਂ ਦੀ ਸੀ ਕਿਉਂਕਿ ਉਸ ਨੇ ਆਪਣੀ ਜ਼ਿੰਦਗੀ ਦੀ ਫੇਸਬੁੱਕ ਦਾ ਸਟੇਟਸ ਬਣਾ ਕੇ ਰੱਖਿਆ ਹੋਇਆ ਸੀ। ਉਹ ਜ਼ਿੰਦਗੀ ਜਿਊਣ ਦੇ ਢੰਗਾਂ ਤੋਂ ਚੰਗੀ ਤਰ੍ਹਾਂ ਜਾਣੂ ਸੀ।

ਜੇ ਇਸ ਧਰਤੀ ਦੇ ਲੋਕ ਮੋਬਾਈਲ 'ਤੇ ਆਪਣੀ ਫੇਸਬੁੱਕ ਦਾ ਸਟੇਟਸ ਮੇਨਟੇਨ ਕਰਨ ਦੇ ਨਾਲ-ਨਾਲ ਆਪਣੀ ਜ਼ਿੰਦਗੀ ਦੀ ਫੇਸਬੁੱਕ ਦਾ ਸਟੇਟਸ ਮੇਨਟੇਨ ਕਰਨਾ ਵੀ ਸਿੱਖ ਜਾਣ ਤਾਂ ਇਹ ਧਰਤੀ ਸਵਰਗ ਬਣ ਸਕਦੀ ਹੈ। ਸਾਰੇ ਰਗੜਿਆਂ -ਝਗੜਿਆਂ ਦਾ ਭੋਗ ਪੈ ਸਕਦਾ ਹੈ। ਹਰ ਬਸ਼ਰ ਬਹੁਤ ਹੀ ਸਹਿਜਮਈ ਢੰਗ ਨਾਲ ਜ਼ਿੰਦਗੀ ਗੁਜ਼ਾਰ ਸਕਦਾ ਹੈ। ਕਿੰਨੀ ਹੈਰਾਨੀ ਦੀ ਗੱਲ ਹੈ ਕਿ ਉਸ ਅਕਾਲ ਪੁਰਖ ਵੱਲੋਂ ਸਾਜੀ ਨਿਵਾਜੀ ਇਸ ਸ੍ਰਿਸ਼ਟੀ ਦੇ ਅਜਬ -ਗਜ਼ਬ ਨਜ਼ਾਰਿਆਂ ਨੂੰ ਛੱਡ ਕੇ ਅਸੀਂ ਉਸ ਸਵਰਗ ਪ੍ਰਾਪਤੀ ਦੀ ਕਲਪਨਾ ਕਰਦੇ ਰਹਿੰਦੇ ਹਾਂ, ਜਿਸ ਨੂੰ ਅੱਜ ਤਕ ਕਿਸੇ ਨੇ ਵੇਖਿਆ ਹੀ ਨਹੀਂ। ਅਸੀਂ ਆਪਣੇ ਸਵਾਰਥਾਂ, ਡਰਾਮਿਆਂ, ਵਿਖਾਵਿਆਂ ਤੇ ਆਪਣੀਆਂ ਸਾਜ਼ਿਸ਼ਾਂ ਕਾਰਨ ਦੁੱਖਾਂ ਦੇ ਤਾਣੇ -ਬਾਣੇ 'ਚ ਉਲਝੇ ਰਹਿੰਦੇ ਹਾਂ। ਮੇਰੇ ਮੋਬਾਈਲ 'ਤੇ ਅਕਸਰ ਹੀ ਫੇਸਬੁੱਕ ਰਾਹੀਂ ਇਹ ਸੁਨੇਹੇ ਪੜ੍ਹਨ ਨੂੰ ਮਿਲਦੇ ਹਨ ਕਿ ਅੱਜ ਮੇਰਾ ਜਨਮ ਦਿਨ ਹੈ। ਅੱਜ ਮੈਂ ਦਿੱਲੀ ਵਿੱਚ ਹਾਂ। ਦੋ ਦਿਨ ਦੇ ਰੁਝੇਵਿਆਂ ਕਾਰਨ ਸੱਜਣਾਂ- ਮਿੱਤਰਾਂ ਨਾਲ ਮੇਰਾ ਮੇਲ ਨਹੀਂ ਹੋ ਸਕਦਾ। ਇਸ ਤੋਂ ਬਿਨਾਂ ਹੋਰ ਵੀ ਬਿਨਾਂ ਸਿਰ -ਪੈਰ ਦੀਆਂ ਗੱਲਾਂ ਫੇਸਬੁੱਕ ਰਾਹੀਂ ਲੋਕਾਂ ਤਕ ਪਹੁੰਚਾਈਆਂ ਜਾਂਦੀਆਂ ਹਨ।

ਨਵੀਂ ਤਕਨਾਲੋਜੀ ਦੇ ਇਸ ਕਮਾਲ ਮੋਬਾਈਲ ਰਾਹੀਂ ਆਪਣੀ ਜ਼ਿੰਦਗੀ ਦੇ ਰੁਝੇਵਿਆਂ ਤੇ ਆਪਣੀ ਸੋਚ ਨੂੰ ਦੂਜਿਆਂ ਤਕ ਪਹੁੰਚਾਉਣ ਵਾਲੇ ਲੋਕਾਂ ਨੂੰ ਇਹ ਵੀ ਸੋਚਣਾ ਚਾਹੀਦਾ ਹੈ ਕਿ ਉਸ ਦੀ ਜ਼ਿੰਦਗੀ ਦੀ ਫੇਸਬੁੱਕ ਨੂੰ ਵੀ ਲੋਕਾਂ ਵੱਲੋਂ ਵਾਚਿਆ ਜਾ ਰਿਹਾ ਹੈ। ਉਨ੍ਹਾਂ ਨੂੰ ਇਹ ਵੀ ਖ਼ਿਆਲ ਰਹਿਣਾ ਚਾਹੀਦਾ ਹੈ ਕਿ ਉਨ੍ਹਾਂ ਦੀ ਜ਼ਿੰਦਗੀ ਦੀ ਫੇਸਬੁੱਕ ਦਾ ਸਟੇਟਸ ਕੀ ਹੈ ? ਕੀ ਉਹ ਇਸ ਦਾ ਹਿਸਾਬ- ਕਿਤਾਬ ਰੱਖਣ ਦਾ ਯਤਨ ਕਰਦੇ ਹਨ ? ਕੋਈ ਮਰੇ ਕੋਈ ਜੀਵੇ , ਸੁਥਰਾ ਘੋਲ ਪਤਾਸੇ ਪੀਵੇ। ਆਪਾਂ ਕਿਸੇ ਤੋਂ ਕੀ ਲੈਣਾ ? ਆਪਣਾ ਰਾਂਝਾ ਰਾਜ਼ੀ ਰੱਖੋ। ਅਜਿਹੀ ਸੋਚ ਰੱਖ ਕੇ ਜ਼ਿੰਦਗੀ ਦਾ ਸਮਾਂ ਲੰਘਾਉਣ ਵਾਲੇ ਲੋਕਾਂ ਦੀ ਜ਼ਿੰਦਗੀ ਦੀ ਫੇਸਬੁੱਕ ਘਸਮੈਲੀ ਤਸਵੀਰ ਵਾਂਗ ਹੀ ਹੁੰਦੀ ਹੈ। ਮਨ 'ਚ ਕੋਈ ਵਲ ਫੇਰ ਨਾ ਰੱਖਣਾ, ਸਾਫ਼ ਸਪੱਸ਼ਟ ਗੱਲ ਕਹਿਣ ਦੀ ਹਿੰਮਤ ਰੱਖਣਾ, ਸਵਾਰਥ ਨਾਲੋਂ ਪਰਮਾਰਥ ਨੂੰ ਤਰਜੀਹ ਦੇਣਾ, ਉਸ ਅਕਾਲ ਪੁਰਖ ਦੇ ਹੁਕਮ 'ਚ ਰਹਿਣਾ, ਧਰਤੀ ਨਾਲ ਜੁੜ ਕੇ ਰਹਿਣਾ ਤੇ ਸਬਰ ਸੰਤੋਖ 'ਚ ਪੂਰਾ- ਪੂਰਾ ਵਿਸ਼ਵਾਸ ਰੱਖਣਾ ਸਾਡੀ ਜ਼ਿੰਦਗੀ ਦੀ ਫੇਸਬੁੱਕ ਨੂੰ ਸਦਾ ਹੀ ਸਾਫ਼-ਸੁਥਰਾ ਰੱਖਦਾ ਹੈ। ਜਿਹੜੇ ਲੋਕ ਇਨ੍ਹਾਂ ਮਹੱਤਵਪੂਰਣ ਤੱਥਾਂ ਨੂੰ ਧਿਆਨ 'ਚ ਰੱਖਦਿਆਂ ਜ਼ਿੰਦਗੀ ਦੀ ਫੇਸਬੁੱਕ ਨੂੰ ਮੇਨਟੇਨ ਰੱਖਦੇ ਹਨ , ਉਸ ਦੀ ਮੌਤ ਤੋਂ ਬਾਅਦ ਵੀ ਉਹ ਇਸ ਧਰਤੀ 'ਤੇ ਜਿਉਂਦੇ ਰਹਿੰਦੇ ਹਨ ਕਿਉਂਕਿ ਲੋਕ ਉਨ੍ਹਾਂ ਦੀ ਚੰਗਿਆਈ ਦੀ ਚਰਚਾ ਕਦੇ ਨਾ ਕਦੇ ਕਰਦੇ ਰਹਿੰਦੇ ਹਨ।

ਇਕ ਪੱਤਰਕਾਰ ਸੱਜਣ ਨਾਲ ਪਿਛਲੇ ਦਿਨੀਂ ਨਵੀਂ ਤਕਨਾਲੋਜੀ ਦੇ ਸਾਧਨਾਂ ਦੀ ਵਰਤੋਂ ਠੀਕ ਢੰਗ ਨਾਲ ਕਰਨ ਬਾਰੇ ਚਰਚਾ ਹੋ ਰਹੀ ਸੀ। ਉਸ ਨੇ ਇਸ ਗੰਭੀਰ ਮੁੱਦੇ 'ਤੇ ਚਰਚਾ ਕਰਦਿਆਂ ਕਿਹਾ ਕਿ ਇਨ੍ਹਾਂ ਸਾਧਨਾਂ ਦੀ ਠੀਕ ਵਰਤੋਂ ਕਰਨਾ ਵੀ ਜ਼ਿੰਦਗੀ ਦੀ ਫੇਸਬੁੱਕ ਦਾ ਹੀ ਇਕ ਹਿੱਸਾ ਹੈ। ਇਕ ਵਕੀਲ ਸੱਜਣ ਵੱਲੋਂ ਮੇਰੇ ਵਟਸਐਪ 'ਤੇ ਇਕ ਅਜਿਹਾ ਗੰਦਾ ਸੁਨੇਹਾ ਭੇਜਿਆ ਗਿਆ ਕਿ ਮੈਨੂੰ ਉਸ ਸੁਨੇਹੇ ਨੂੰ ਪੜ੍ਹਦੇ ਨੂੰ ਵੀ ਸ਼ਰਮ ਆ ਰਹੀ ਸੀ। ਮੈਂ ਉਸ ਨੂੰ ਫੋਨ ਕਰ ਕੇ ਕਿਹਾ ਕਿ ਵਕੀਲ ਸਾਹਿਬ, ਤੁਹਾਨੂੰ ਇਹ ਅਸ਼ਲੀਲ ਸੁਨੇਹਾ ਭੇਜਣ ਤੋਂ ਪਹਿਲਾਂ ਸੋਚ ਲੈਣਾ ਚਾਹੀਦਾ ਸੀ ਕਿ ਮੈਂ ਇਸ ਤਰ੍ਹਾਂ ਦਾ ਇਨਸਾਨ ਹਾਂ ਜਾਂ ਨਹੀਂ। ਵਕੀਲ ਸਾਹਿਬ ਮੇਰੇ ਸ਼ਬਦ ਸੁਣ ਕੇ ਮਾਫ਼ੀ ਮੰਗਦੇ ਸਾਹ ਨਹੀਂ ਸੀ ਲੈ ਰਹੇ। ਉਨ੍ਹਾਂ ਨੇ ਆਪਣੇ ਮੋਬਾਈਲ ਤੋਂ ਘੱਟੋ -ਘੱਟ ਵੀਹ ਵਾਰ ਗ਼ਲ਼ਤੀ ਮੰਨਣ ਦਾ ਸੁਨੇਹਾ ਭੇਜਿਆ। ਜ਼ਰਾ ਸੋਚੋ ਉਸ ਵਕੀਲ ਸੱਜਣ ਬਾਰੇ ਲੋਕਾਂ ਦੇ ਕਿਸ ਤਰ੍ਹਾਂ ਦੇ ਵਿਚਾਰ ਹੋਣਗੇ ਤੇ ਉਹ ਆਪਣੀ ਨਿੱਜੀ ਜ਼ਿੰਦਗੀ 'ਚ ਕਿਸ ਤਰ੍ਹਾਂ ਦੇ ਵਿਚਾਰ ਰੱਖਦਾ ਹੋਵੇਗਾ? ਸਾਡੀ ਮਾੜੀ -ਚੰਗੀ ਸੋਚ, ਸਾਡਾ ਚੰਗਾ -ਮਾੜਾ ਬੋਲਣਾ, ਸਮਾਜ 'ਚ ਵਿਚਰਨਾ ਹੀ ਸਮਾਜ 'ਚ ਸਾਡੇ ਪ੍ਰਭਾਵ ਨੂੰ ਚੰਗਾ ਮਾੜਾ ਬਣਾਉਂਦਾ ਹੈ। ਇਹੋ ਹੀ ਸਾਡੀ ਜ਼ਿੰਦਗੀ ਦੀ ਫੇਸਬੁੱਕ ਹੈ।

ਸਾਡੇ ਦਿੱਲੀ ਵਸਦੇ ਇਕ ਰਿਸ਼ਤੇਦਾਰ ਨੇ ਆਪਣੇ ਪਿੰਡ ਦੀ ਜ਼ਮੀਨ ਵੇਚਣੀ ਸੀ। ਉਸ ਨੂੰ ਦਿੱਲੀ ਜਾ ਵਸਿਆਂ ਘੱਟੋ -ਘੱਟ ਪੰਜਾਹ ਸਾਲ ਦਾ ਅਰਸਾ ਹੋ ਚੁੱਕਿਆ ਹੈ। ਉਸ ਨੇ ਪਿੰਡ ਦੇ ਦਸ -ਪੰਜਾਹ ਲੋਕਾਂ ਨੂੰ ਕਿਹਾ ਕਿ ਉਹ ਆਪਣੀ ਪੰਜ ਕਿੱਲੇ ਜ਼ਮੀਨ ਵੇਚਣੀ ਚਾਹੁੰਦਾ ਹੈ। ਉਸ ਨੇ ਲੋਕਾਂ ਨੂੰ ਆਪਣਾ ਭਾਅ ਵੀ ਦੱਸ ਦਿੱਤਾ। ਪਿੰਡ ਦੇ ਲੋਕਾਂ ਨੇ ਸੱਚਿਆ ਕਿ ਦਿੱਲੀ ਵਸਦੇ ਇਸ ਵਿਅਕਤੀ ਨੂੰ ਜ਼ਮੀਨ ਦੇ ਭਾਅ ਦਾ ਕੀ ਪਤਾ ? ਕਿਸੇ ਨੇ ਵੀ ਉਸ ਦੇ ਭਾਅ ਅਨੁਸਾਰ ਉਸ ਦੀ ਜ਼ਮੀਨ ਲੈਣ ਨੂੰ ਹਾਂ ਨਹੀਂ ਕੀਤੀ ਪਰ ਇਕ ਭੋਲਾ ਜਿਹਾ ਬੰਦਾ ਉਸ ਦੀ ਜ਼ਮੀਨ ਖ਼ਰੀਦਣ ਲਈ ਤਿਆਰ ਹੋ ਗਿਆ। ਉਸ ਨੇ ਉਸ ਵਿਅਕਤੀ ਨੂੰ ਕਿਹਾ ਕਿ ਉਹ ਉਸ ਦੀ ਜ਼ਮੀਨ ਖ਼ਰੀਦਣ ਨੂੰ ਤਿਆਰ ਹੈ ਪਰ ਉਸ ਜ਼ਮੀਨ ਦੀ ਰਜਿਸਟਰੀ ਪੂਰੇ ਛੇ ਮਹੀਨੇ ਬਾਅਦ ਕਰਵਾਏਗਾ। ਉਸ ਨੇ ਉਸ ਨੂੰ ਹਾਂ ਕਰ ਦਿੱਤੀ। ਜ਼ਮੀਨ ਖ਼ਰੀਦਣ ਵਾਲੇ ਨੇ ਨਾ ਕੁਝ ਲਿਆ ਤੇ ਨਾ ਕੁਝ ਦਿੱਤਾ। ਉਨ੍ਹਾਂ ਦਾ ਕੋਈ ਲਿਖ ਲਿਖਾ ਵੀ ਨਹੀਂ ਹੋਇਆ। ਉਸ ਨੇ ਜ਼ਮੀਨ ਖ਼ਰੀਦਣ ਵਾਲੇ ਨੂੰ ਕਿਹਾ ਕਿ ਉਹ ਪੂਰੇ ਛੇ ਮਹੀਨੇ ਬਾਅਦ ਆਵੇਗਾ ਤੇ ਉਹ ਰਕਮ ਤਿਆਰ ਰੱਖੇ। ਉਹ ਉਸ ਦੇ ਨਾਂ ਰਜਿਸਟਰੀ ਕਰ ਦੇਵੇਗਾ।

ਐਨੀ ਗੱਲ ਕਹਿ ਕੇ ਉਹ ਦਿੱਲੀ ਨੂੰ ਤੁਰ ਗਿਆ। ਜਦੋਂ ਪਿੰਡ ਦੇ ਲੋਕਾਂ ਨੂੰ ਜ਼ਮੀਨ ਦੇ ਸੌਦੇ ਹੋਣ ਦਾ ਪਤਾ ਲੱਗਾ ਤਾਂ ਉਸ ਦੇ ਪੈਰਾਂ ਹੇਠੋਂ ਜ਼ਮੀਨ ਨਿਕਲ ਗਈ। ਉਹ ਸੋਚਣ ਲੱਗੇ ਕਿ ਇਹ ਸੌਦਾ ਤਾਂ ਬਹੁਤ ਸਸਤਾ ਹੋ ਗਿਆ। ਲੋਕ ਸਾਡੇ ਉਸ ਰਿਸ਼ਤੇਦਾਰ ਕੋਲ ਦਿੱਲੀ ਪਹੁੰਚ ਗਏ। ਉਹ ਉਸ ਨੂੰ ਸੌਦਾ ਤੋੜਨ ਲਈ ਕਹਿਣ ਲੱਗੇ। ਉਸ ਨੇ ਉਨ੍ਹਾਂ ਲੋਕਾਂ ਨੂੰ ਚਾਹ ਪਿਲਾਉਣ ਤੋਂ ਬਾਅਦ ਕਿਹਾ, ''ਮਿੱਤਰੋ ! ਬੰਦੇ ਦੀ ਜ਼ੁਬਾਨ ਦੀ ਕੋਈ ਕੀਮਤ ਨਹੀਂ ਹੁੰਦੀ? ਮੈਂ ਚਾਰ ਧੇਲਿਆਂ ਦੇ ਲਾਲਚ 'ਚ ਆ ਕੇ ਆਪਣੀ ਜ਼ੁਬਾਨ ਤੋਂ ਪਿੱਛੇ ਨਹੀਂ ਹਟਣਾ। ਜੇ ਉਸ ਵਿਅਕਤੀ ਨੇ ਰਜਿਸਟਰੀ ਨਾ ਕਰਵਾਈ ਤਾਂ ਤੁਹਾਡੇ ਨਾਲ ਗੱਲ ਕਰਾਂਗਾ। ਛੇ ਮਹੀਨੇ ਦੀ ਉਡੀਕ ਕਰੋ।'' ਉਸ ਨੇ ਉਸੇ ਵਿਅਕਤੀ ਨੂੰ ਹੀ ਜ਼ਮੀਨ ਦੀ ਰਜਿਸਟਰੀ ਕੀਤੀ। ਉਸ ਵਿਅਕਤੀ ਦੇ ਲਾਲਚੀ ਨਾ ਹੋਣ ਦੇ ਸਬੂਤ ਨੇ ਉਸ ਦੇ ਜ਼ਿੰਦਗੀ ਪ੍ਰਤੀ ਨਜ਼ਰੀਏ ਨੂੰ ਸਪੱਸ਼ਟ ਕਰ ਦਿੱਤਾ। ਉਸ ਦੇ ਇਸ ਗੁਣ ਨੇ ਉਸ ਨੂੰ ਚਰਚਾ ਦਾ ਵਿਸ਼ਾ ਬਣਾ ਦਿੱਤਾ। ਆਪਣੇ ਆਪ ਨੂੰ ਸਾਰੇ ਚੰਗਾ ਕਹਿ ਲੈਂਦੇ ਹਨ, ਬੰਦਾ ਤਾਂ ਉਹ ਹੈ ਜਿਸ ਨੂੰ ਦੂਜੇ ਲੋਕ ਚੰਗਾ ਕਹਿਣ।

ਪਿੰ. ਵਿਜੈ ਕੁਮਾਰ

98726-27136

ਚੋਣ ਕਮਿਸ਼ਨ ਵੱਲੋਂ ਲੋਕ ਸਭਾ ਚੋਣਾਂ ਦੀਆਂ ਤਾਰੀਕਾਂ ਦੇ ਐਲਾਨ ਨਾਲ ਹੀ ਦੇਸ਼ ਲੋਕਤੰਤਰ ਦਾ ਉਤਸਵ ਮਨਾਉਣ ਦੀ ਦਿਸ਼ਾ 'ਚ ਅੱਗੇ ਵਧ ਚੱਲਿਆ ਹੈ। ਪਿਛਲੀਆਂ ਚੋਣਾਂ 'ਚ 9 ਪੜਾਆਂ ਦੇ ਮੁਕਾਬਲੇ ਇਸ ਵਾਰ ਸੱਤ ਪੜਾਆਂ 'ਚ ਚੋਣਾਂ ਕਰਵਾਉਣ ਦੇ ਐਲਾਨ ਨਾਲ ਇਹ ਤਾਂ ਸਪੱਸ਼ਟ ਹੁੰਦਾ ਹੈ ਕਿ ਚੋਣ ਕਮਿਸ਼ਨ ਪਹਿਲਾਂ ਦੇ ਮੁਕਾਬਲੇ ਕੁਝ ਹੋਰ ਸਮਰੱਥ ਹੋਇਆ ਹੈ ਪਰ ਉਸ ਦੀ ਕੋਸ਼ਿਸ਼ ਇਹੋ ਹੋਣੀ ਚਾਹੀਦੀ ਹੈ ਕਿ ਚੋਣ ਪ੍ਰਕਿਰਿਆ ਘੱਟ ਤੋਂ ਘੱਟ ਲੰਬੀ ਹੋਵੇ। ਚੋਣ ਪ੍ਰਕਿਰਿਆ ਨਾ ਕੇਵਲ ਛੋਟੀ ਹੋਣੀ ਚਾਹੀਦੀ ਹੈ ਸਗੋਂ ਇਹ ਸਿਆਸੀ ਪਾਰਟੀਆਂ ਤੇ ਉਨ੍ਹਾਂ ਦੇ ਉਮੀਦਵਾਰਾਂ ਦੇ ਛਲ-ਕਪਟ ਤੋਂ ਮੁਕਤ ਵੀ ਹੋਣੀ ਚਾਹੀਦੀ ਹੈ। ਇਹ ਸਹੀ ਹੈ ਕਿ ਪਹਿਲਾਂ ਦੇ ਮੁਕਾਬਲੇ ਅੱਜ ਦੀ ਚੋਣ ਪ੍ਰਕਿਰਿਆ ਕਿਤੇ ਜ਼ਿਆਦਾ ਸਾਫ਼-ਸੁਥਰੀ ਤੇ ਭਰੋਸੇਮੰਦ ਹੈ ਪਰ ਇਕ ਸੱਚਾਈ ਇਹ ਵੀ ਹੈ ਕਿ ਇਹ ਬੇਹੱਦ ਖ਼ਰਚੀਲੀ ਹੋਣ ਦੇ ਨਾਲ ਹੀ ਪੈਸੇ ਦੇ ਜ਼ੋਰ ਨਾਲ ਵੀ ਪ੍ਰਭਾਵਿਤ ਹੋਣ ਲੱਗੀ ਹੈ।

ਵਿਡੰਬਨਾ ਇਹ ਹੈ ਕਿ ਚੋਣ ਲੜਨ ਵਾਲੇ ਇਹ ਸਹੁੰ ਪੱਤਰ ਦੇ ਕੇ ਪਰ੍ਹਾਂ ਹੋ ਜਾਂਦੇ ਹਨ ਕਿ ਉਨ੍ਹਾਂ ਨੇ ਤੈਅ ਹੱਦ ਅੰਦਰ ਹੀ ਧਨ ਖ਼ਰਚ ਕੀਤਾ। ਹਰ ਸਿਆਸੀ ਪਾਰਟੀ ਤੇ ਖ਼ੁਦ ਚੋਣ ਕਮਿਸ਼ਨ ਵੀ ਇਸ ਗੱਲ ਤੋਂ ਜਾਣੂ ਹੈ ਕਿ ਅੱਜ ਚੋਣਾਂ 'ਚ ਕਿਸ ਤਰ੍ਹਾਂ ਪਾਣੀ ਦੀ ਤਰ੍ਹਾਂ ਪੈਸਾ ਵਹਾਇਆ ਜਾਂਦਾ ਹੈ। ਹੁਣ ਤਾਂ ਹਾਲਤ ਇਹ ਹੈ ਕਿ ਪੈਸੇ ਵੰਡ ਕੇ ਚੋਣ ਜਿੱਤ ਲੈਣ ਦੀ ਪ੍ਰਵਿਰਤੀ ਵਧਦੀ ਹੀ ਜਾ ਰਹੀ ਹੈ। ਸਮੱਸਿਆ ਇਹ ਹੈ ਕਿ ਜਿੱਥੇ ਜਾਗਰੂਕ ਜਨਤਾ ਚੋਣਾਂ 'ਚ ਖਾਮੀਆਂ ਨੂੰ ਦੂਰ ਕਰਨ ਦੀ ਜ਼ਰੂਰਤ ਮਹਿਸੂਸ ਕਰਦੀ ਹੈ, ਉੱਥੇ ਹੀ ਸਿਆਸੀ ਪਾਰਟੀਆਂ ਅਜਿਹੀ ਕਿਸੇ ਜ਼ਰੂਰਤ 'ਤੇ ਧਿਆਨ ਹੀ ਨਹੀਂ ਦਿੰਦੀਆਂ। ਇਹ ਚੰਗਾ ਨਹੀਂ ਹੋਇਆ ਕਿ ਪਿਛਲੇ ਪੰਜ ਸਾਲਾਂ 'ਚ ਨਾ ਤਾਂ ਕੋਈ ਠੋਸ ਰਾਜਨੀਤਕ ਸੁਧਾਰ ਕੀਤਾ ਗਿਆ ਤੇ ਨਾ ਹੀ ਚੋਣ ਸੁਧਾਰ।

ਆਮ ਚੋਣਾਂ ਨੂੰ ਭਾਵੇਂ ਹੀ ਲੋਕਤੰਤਰ ਦੇ ਉਤਸਵ ਦਾ ਨਾਂ ਦਿੱਤਾ ਜਾਂਦਾ ਹੋਵੇ ਪਰ ਸੱਚ ਇਹ ਹੈ ਕਿ ਇਸ ਉਤਸਵ 'ਚ ਸਿਆਸੀ ਵੈਰ ਭਾਵਨਾ ਆਪਣੀ ਚਰਮ ਸੀਮਾ ਤਕ ਪਹੁੰਚਦੀ ਦਿਸਦੀ ਹੈ। ਕਈ ਵਾਰ ਆਪਸੀ ਵਿਰੋਧੀ ਸਿਆਸੀ ਪਾਰਟੀਆਂ ਇਕ ਦੂਜੇ ਪ੍ਰਤੀ ਦੁਸ਼ਮਣਾਂ ਵਾਲਾ ਵਿਵਹਾਰ ਕਰਦੀਆਂ ਹਨ। ਉਹ ਨਾ ਸਿਰਫ਼ ਆਪਣੇ ਸਿਆਸੀ ਵਿਰੋਧੀਆਂ ਪ੍ਰਤੀ ਅਸੱਭਿਅਕ ਭਾਸ਼ਾ ਦਾ ਇਸਤੇਮਾਲ ਕਰਦੀਆਂ ਹਨ ਸਗੋਂ ਉਨ੍ਹਾਂ ਨੂੰ ਬਦਨਾਮ ਕਰਨ ਤੇ ਨੀਵਾਂ ਦਿਖਾਉਣ ਲਈ ਝੂਠ ਤੇ ਕਪਟ ਦਾ ਸਹਾਰਾ ਵੀ ਲੈਂਦੀਆਂ ਹਨ। ਮੰਦੇ ਭਾਗੀਂ ਸਿਆਸੀ ਪਾਰਟੀਆਂ ਤੋਂ ਇਹ ਉਮੀਦ ਘੱਟ ਹੀ ਹੈ ਕਿ ਉਹ ਸਿਆਸੀ ਨੈਤਿਕਤਾ ਤੇ ਜਮਹੂਰੀ ਮਰਿਆਦਾ ਦਾ ਧਿਆਨ ਰੱਖਦਿਆਂ ਚੋਣ ਲੜਨਗੀਆਂ। ਇਸ ਸੂਰਤ 'ਚ ਵੋਟਰਾਂ ਦੀ ਜ਼ਿੰਮੇਵਾਰੀ ਵਧ ਜਾਂਦੀ ਹੈ ਕਿ ਉਹ ਆਪਣੇ ਵੋਟ ਦੇ ਅਧਿਕਾਰ ਦੀ ਵਰਤੋਂ ਸੋਚ ਸਮਝ ਕੇ ਕਰਨ। ਆਪਣੇ ਦੇਸ਼ 'ਚ ਇਹ ਇਕ ਤਰ੍ਹਾਂ ਦੀ ਬਿਮਾਰੀ ਹੈ ਕਿ ਉਂਜ ਤਾਂ ਅਸੀਂ ਜਾਤੀਵਾਦ, ਫਿਰਕੂਵਾਦ ਤੇ ਖੇਤਰਵਾਦ ਨੂੰ ਕੋਸਦੇ ਹਾਂ ਪਰ ਵੋਟ ਦੇਣ ਸਮੇਂ ਜਾਤ-ਧਰਮ ਨੂੰ ਮਹੱਤਵ ਦਿੰਦੇ ਹਾਂ।

ਜਾਤ-ਪਾਤ ਦੇ ਆਧਾਰ 'ਤੇ ਰਾਜਨੀਤੀ ਇਸੇ ਲਈ ਹੁੰਦੀ ਹੈ ਕਿਉਂਕਿ ਇਕ ਤਬਕਾ ਇਸੇ ਆਧਾਰ 'ਤੇ ਵੋਟ ਦਿੰਦਾ ਹੈ। ਇਹ ਵੀ ਕਿਸੇ ਤੋਂ ਲੁਕਿਆ ਨਹੀਂ ਕਿ ਕਈ ਵਾਰ ਦੇਸ਼ਹਿੱਤ ਦੇ ਮਸਲਿਆਂ ਤੋਂ ਜ਼ਿਆਦਾ ਮਹੱਤਵ ਸੌੜੇ ਸੁਆਰਥਾਂ ਨੂੰ ਦੇ ਦਿੱਤਾ ਜਾਂਦਾ ਹੈ। ਆਮ ਚੋਣਾਂ ਦੇਸ਼ ਦੇ ਭਵਿੱਖ ਦੇ ਨਾਲ-ਨਾਲ ਰਾਜਨੀਤੀ ਦੀ ਦਸ਼ਾ ਤੇ ਦਿਸ਼ਾ ਤੈਅ ਕਰਦੇ ਹਨ। ਇਸ ਲਈ ਆਮ ਵੋਟਰ ਦਾ ਇਸ ਭਾਵਨਾ ਨਾਲ ਲੈਸ ਹੋਣਾ ਜ਼ਰੂਰੀ ਹੈ ਕਿ ਉਹ ਵੋਟ ਜ਼ਰੀਏ ਇਕ ਮਹੱਤਵਪੂਰਨ ਕੰਮ ਕਰਨ ਜਾ ਰਿਹਾ ਹੈ।

ਪੁਲਵਾਮਾ ਅੱਤਵਾਦੀ ਹਮਲੇ ਦਾ ਬਦਲਾ ਭਾਰਤੀ ਹਵਾਈ ਫ਼ੌਜ ਨੇ ਪਾਕਿਸਤਾਨ 'ਚ ਅੱਤਵਾਦੀ ਟਿਕਾਣਿਆਂ 'ਤੇ ਏਅਰ ਸਟ੍ਰਾਈਕ ਕਰ ਕੇ ਲਿਆ। ਇਸ ਕਾਰਵਾਈ ਤੋਂ ਬੌਖਲਾਏ ਪਾਕਿਸਤਾਨ ਨੇ ਭਾਰਤ ਦੇ ਫ਼ੌਜੀ ਟਿਕਾਣਿਆਂ ਨੂੰ ਨਿਸ਼ਾਨਾ ਬਣਾਉਣ ਲਈ 27 ਫਰਵਰੀ ਨੂੰ ਆਪਣੀ ਹਵਾਈ ਫ਼ੌਜ ਦਾ ਇਸਤੇਮਾਲ ਕੀਤਾ। ਪਾਕਿਸਤਾਨ ਨੂੰ ਕਿਤੇ ਨਾ ਕਿਤੇ ਇਹ ਅਹਿਸਾਸ ਹੋ ਗਿਆ ਸੀ ਕਿ ਭਾਰਤ ਉਸ ਦੀ ਇਸ ਜੁਅੱਰਤ ਦਾ ਸਖ਼ਤ ਜਵਾਬ ਜ਼ਰੂਰ ਦੇਵੇਗਾ। ਉਸ ਨੂੰ ਲੱਗਾ ਕਿ ਇਸ ਤੋਂ ਬਚਣ ਲਈ ਕੁਝ ਨਾ ਕੁਝ ਦਿਖਾਵਾ ਕਰਨਾ ਹੀ ਹੋਵੇਗਾ। ਇਸੇ ਕਾਰਨ ਇਮਰਾਨ ਖ਼ਾਨ ਤੇ ਪਾਕਿਸਤਾਨੀ ਫ਼ੌਜ ਨੇ ਵਿੰਗ ਕਮਾਂਡਰ ਅਭਿਨੰਦਨ ਵਰਤਮਾਨ ਨੂੰ ਜਲਦ ਤੋਂ ਜਲਦ ਵਾਪਸ ਭਾਰਤ ਭੇਜਣ ਦਾ ਫ਼ੈਸਲਾ ਲਿਆ।

ਹਾਲਾਂਕਿ ਇਸ ਦੇ ਨਾਲ ਹੀ ਅਮਰੀਕਾ ਸਮੇਤ ਪ੍ਰਮੁੱਖ ਆਲਮੀ ਸ਼ਕਤੀਆਂ ਨਾਲ ਕੂਟਨੀਤਕ ਰਿਸ਼ਤੇ ਤੇ ਇਨ੍ਹਾਂ ਦੇਸ਼ਾਂ ਦੇ ਪਰਮਾਣੂ ਸ਼ਕਤੀ ਨਾਲ ਲੈਸ ਭਾਰਤ-ਪਾਕਿ ਦਰਮਿਆਨ ਸੈਨਿਕ ਟਕਰਾਅ ਨੂੰ ਹੋਰ ਜ਼ਿਆਦਾ ਭੜਕਦੇ ਹੋਏ ਨਾ ਦੇਖਣ ਦੀ ਇੱਛਾ ਨੇ ਵੀ ਪਾਕਿਸਤਾਨ ਨੂੰ ਗੋਡੇ ਟੇਕਣ 'ਤੇ ਮਜਬੂਰ ਕਰ ਦਿੱਤਾ। ਫਿਲਹਾਲ ਭਾਰਤ-ਪਾਕਿਸਤਾਨ ਦਰਮਿਆਨ ਇਕ ਵੱਡਾ ਸੰਕਟ ਟਲ ਗਿਆ ਹੈ ਤੇ ਦੋਵੇਂ ਦੇਸ਼ਾਂ ਦੇ ਦੁਵੱਲੇ ਰਿਸ਼ਤੇ ਆਮ ਨਾਂਹਪੱਖੀ ਸਥਿਤੀ 'ਚ ਪਰਤ ਆਏ ਹਨ, ਜਿਸ ਵਿਚ ਜੰਮੂ-ਕਸ਼ਮੀਰ 'ਚ ਕੰਟਰੋਲ ਰੇਖਾ ਤੇ ਕੌਮਾਂਤਰੀ ਸਰਹੱਦ 'ਤੇ ਤਣਾਅ ਤੇ ਗੋਲ਼ੀਬਾਰੀ ਦੀਆਂ ਘਟਨਾਵਾਂ ਸ਼ਾਮਿਲ ਹਨ। ਪਾਕਿਸਤਾਨ ਨੇ ਕੁਝ ਅੱਤਵਾਦੀਆਂ ਦੀ ਗ੍ਰਿਫ਼ਤਾਰੀ ਕੀਤੀ ਹੈ ਪਰ ਭਾਰਤ ਇਹੋ ਮੰਨ ਕੇ ਚੱਲੇ ਕਿ ਪਾਕਿਸਤਾਨ ਭਾਰਤ ਨੂੰ ਨੁਕਸਾਨ ਪਹੁੰਚਾਉਣ ਵਾਲੇ ਅੱਤਵਾਦ ਨੂੰ ਆਸਾਨੀ ਨਾਲ ਨਹੀਂ ਛੱਡੇਗਾ। ਉਸ ਦਾ ਮਕਸਦ ਭਾਰਤ ਨੂੰ ਰੱਖਿਆਤਮਕ ਬਣਾਈ ਰੱਖਣਾ ਹੈ।

ਪੁਲਵਾਮਾ ਹਮਲੇ ਤੋਂ ਬਾਅਦ ਸਾਰੀਆਂ ਘਟਨਾਵਾਂ ਦਾ ਤੱਥਪੂਰਵਕ ਅਧਿਐਨ ਤੇ ਵਿਸ਼ਲੇਸ਼ਣ ਜ਼ਰੂਰੀ ਹੈ ਤਾਂ ਕਿ ਸਾਡੀ ਸਰਕਾਰ ਤੇ ਦੇਸ਼ ਦੀ ਜਨਤਾ ਸਹੀ ਸਬਕ ਲੈ ਸਕੇ ਤੇ ਨਾਲ ਹੀ ਭਵਿੱਖ ਲਈ ਨਵੀਆਂ ਰਣਨੀਤੀਆਂ ਬਣਾ ਸਕੇ। ਬਾਲਾਕੋਟ 'ਚ ਭਾਰਤੀ ਹਵਾਈ ਫ਼ੌਜ ਦੀ ਏਅਰ ਸਟ੍ਰਾਈਕ ਦੀ ਯੋਜਨਾ ਬਹੁਤ ਹੀ ਸਾਵਧਾਨੀ ਤੇ ਬਾਰੀਕੀ ਨਾਲ ਬਣਾਈ ਗਈ। ਜਿਵੇਂ ਕਿ ਸਰਕਾਰ ਨੇ ਕਿਹਾ ਕਿ ਉਸ ਦੀ ਕਾਰਵਾਈ ਅੱਤਵਾਦ ਖ਼ਿਲਾਫ਼ ਸੀ। ਇਸ ਜ਼ਰੀਏ ਉਸ ਦਾ ਮਕਸਦ ਜੈਸ਼-ਏ-ਮੁਹੰਮਦ ਦੇ ਸੰਭਾਵਿਤ ਹਮਲਿਆਂ ਨੂੰ ਰੋਕਣਾ ਸੀ ਕਿਉਂਕਿ ਭਾਰਤੀ ਖੁਫ਼ੀਆ ਏਜੰਸੀਆਂ ਨੂੰ ਅਜਿਹੀਆਂ ਖ਼ਬਰਾਂ ਮਿਲੀਆਂ ਸਨ ਕਿ ਉੱਥੇ ਜੈਸ਼-ਏ-ਮੁਹੰਮਦ ਦੇ ਅੱਤਵਾਦੀ ਭਾਰਤ 'ਤੇ ਹਮਲਾ ਕਰਨ ਦੀ ਯੋਜਨਾ ਬਣਾ ਰਹੇ ਹਨ। ਇਸ ਏਅਰ ਸਟ੍ਰਾਈਕ ਜ਼ਰੀਏ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਪਾਕਿਸਤਾਨ ਨੂੰ ਸਬਕ ਸਿਖਾਉਣ ਲਈ ਇਕ ਨਵਾਂ ਤਰੀਕਾ ਅਪਣਾ ਲਿਆ ਹੈ। ਹੁਣ ਪਾਕਿਸਤਾਨ ਨਾਲ ਪੇਸ਼ ਆਉਣ ਦੇ ਉਸ ਤਰੀਕੇ ਤੋਂ ਬੇਮੁੱਖ ਹੋਣਾ ਕਿਸੇ ਵੀ ਨਵੀਂ ਸਰਕਾਰ ਲਈ ਮੁਸ਼ਕਲ ਹੋਵੇਗਾ, ਜੋ ਤਰੀਕਾ 2016 ਦੇ ਉੜੀ ਹਮਲੇ ਤੋਂ ਪਹਿਲਾਂ ਅਪਣਾਇਆ ਜਾਂਦਾ ਸੀ। ਇਸ ਨਾਲ ਪਾਕਿਸਤਾਨ ਤੇ ਆਲਮੀ ਭਾਈਚਾਰੇ ਨੂੰ ਇਹ ਅਹਿਸਾਸ ਹੋ ਗਿਆ ਹੋਵੇਗਾ ਕਿ ਭਾਰਤ ਦੇ ਕੂਟਨੀਤਕ ਸੰਜਮ ਦੀ ਹੱਦ ਹੁਣ ਖ਼ਤਮ ਹੋ ਗਈ ਹੈ ਤੇ ਭਾਰਤ ਪਹਿਲਾਂ ਦੀ ਤਰ੍ਹਾਂ ਅੱਤਵਾਦੀ ਹਮਲੇ ਹੋਣ 'ਤੇ ਬਰਦਾਸ਼ਤ ਕਰਨ ਦੀ ਬਜਾਏ ਸਖ਼ਤ ਜਵਾਬ ਦੇਵੇਗਾ। ਹੁਣ ਭਾਰਤੀ ਕਾਰਵਾਈ ਨੂੰ ਰੋਕਣ ਦੀ ਜ਼ਿੰਮੇਵਾਰੀ ਪਾਕਿਸਤਾਨ ਦੀ ਹੋਵੇਗੀ। ਜੇ ਪਾਕਿਸਤਾਨ ਆਪਣੇ ਰੁਖ ਨੂੰ ਨਰਮ ਨਾ ਕਰਦਾ ਤੇ ਵਿੰਗ ਕਮਾਂਡਰ ਅਭਿਨੰਦਨ ਵਰਤਮਾਨ ਨੂੰ ਛੱਡਣ ਦਾ ਫ਼ੈਸਲਾ ਨਾ ਕਰਦਾ ਤਾਂ ਭਾਰਤ ਹੋਰ ਵੀ ਕਠੋਰ ਫ਼ੌਜੀ ਕਾਰਵਾਈ ਕਰਨ ਲਈ ਮਜਬੂਰ ਹੁੰਦਾ। ਇਹ ਗੱਲ ਪਿਛਲੇ ਕੁਝ ਦਿਨਾਂ ਦੇ ਘਟਨਾਕ੍ਰਮ ਤੋਂ ਹੋਰ ਵੀ ਸਪੱਸ਼ਟ ਹੋ ਜਾਂਦੀ ਹੈ।

ਹਾਲਾਂਕਿ ਪਾਕਿਸਤਾਨੀ ਅੱਤਵਾਦ ਖ਼ਿਲਾਫ਼ ਭਾਰਤ ਦੇ ਰੁਖ 'ਚ ਤਾਂ ਵਿਆਪਕ ਬਦਲਾਅ ਆਇਆ ਪਰ ਭਾਰਤੀ ਵਿਦੇਸ਼ ਨੀਤੀ ਜਿਉਂ ਦੀ ਤਿਉਂ ਬਣੀ ਹੋਈ ਹੈ। ਭਾਰਤ ਦੀ ਸੋਚ ਇਹੋ ਹੈ ਕਿ ਭਾਰਤ-ਪਾਕਿਸਤਾਨ 'ਚ ਮੌਜੂਦ ਵਿਵਾਦ ਨੂੰ ਕਿਸੇ ਤੀਜੀ ਧਿਰ ਦੇ ਦਖ਼ਲ ਦੀ ਬਜਾਏ ਦੁਵੱਲੀ ਵਾਰਤਾ ਨਾਲ ਹੀ ਸੁਲਝਾਇਆ ਜਾਣਾ ਚਾਹੀਦਾ ਹੈ। ਇਸ ਸੰਦਰਭ 'ਚ ਸਾਨੂੰ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਇਸ ਬਿਆਨ ਨੂੰ ਜ਼ਰੂਰ ਧਿਆਨ 'ਚ ਰੱਖਣਾ ਚਾਹੀਦਾ ਹੈ, ਜਿਸ 'ਚ ਉਨ੍ਹਾਂ ਨੇ ਕਿਹਾ ਸੀ ਕਿ ਭਾਰਤ ਤੇ ਪਾਕਿਸਤਾਨ 'ਚ ਸ਼ਾਂਤੀ ਬਹਾਲੀ ਲਈ ਅਮਰੀਕਾ ਕੋਸ਼ਿਸ਼ ਕਰ ਰਿਹਾ ਹੈ ਤੇ ਇਸ ਲਈ ਉਹ ਦੋਵਾਂ ਦੇਸ਼ਾਂ ਦੇ ਸੰਪਰਕ 'ਚ ਹੈ। ਉਨ੍ਹਾਂ ਇਹ ਵੀ ਕਿਹਾ ਕਿ ਭਾਰਤ-ਪਾਕਿਸਤਾਨ ਤੋਂ ਜਲਦ ਹੀ ਚੰਗੀ ਖ਼ਬਰ ਆਉਣ ਵਾਲੀ ਹੈ। ਇਸ ਤੋਂ ਤੁਰੰਤ ਬਾਅਦ ਪਾਕਿਸਤਾਨੀ ਪ੍ਰਧਾਨ ਮੰਤਰੀ ਇਮਰਾਨ ਖ਼ਾਨ ਨੇ ਵਿੰਗ ਕਮਾਂਡਰ ਅਭਿਨੰਦਨ ਵਰਤਮਾਨ ਨੂੰ ਭਾਰਤ ਵਾਪਸ ਭੇਜਣ ਦਾ ਐਲਾਨ ਕਰ ਦਿੱਤਾ।

ਇਸ ਦਾ ਇਹ ਮਤਲਬ ਨਹੀਂ ਕਿ ਭਾਰਤ ਨੇ ਆਪਣੇ ਰਵਾਇਤੀ ਤੇ ਭਰੋਸੇਯੋਗ ਸਿਧਾਂਤ ਤੋਂ ਤੌਬਾ ਕਰ ਲਈ ਕਿ ਪਾਕਿਸਤਾਨ ਨਾਲ ਵਿਵਾਦਤ ਮੁੱਦਿਆਂ ਨੂੰ ਬਿਨਾਂ ਕਿਸੇ ਬਾਹਰੀ ਦਖ਼ਲ ਤੋਂ ਆਪਸੀ ਗੱਲਬਾਤ ਜ਼ਰੀਏ ਹੱਲ ਕੀਤਾ ਜਾਣਾ ਚਾਹੀਦਾ ਹੈ। ਅਜਿਹਾ ਇਸ ਲਈ ਕਿਉਂਕਿ ਜੰਮੂ-ਕਸ਼ਮੀਰ ਜਿਹੀ ਲੰਬੀ ਸਮੇਂ ਤੋਂ ਚਲੀ ਆ ਰਹੀ ਸਮੱਸਿਆ 'ਚ ਤੀਜੇ ਦੇਸ਼ ਦੀ ਵਿਚੋਲਗੀ ਦੀ ਇਜਾਜ਼ਤ ਦੇਣ ਤੇ ਭਾਰਤ-ਪਾਕਿ ਦਰਮਿਆਨ ਸੰਘਰਸ਼ ਦੀ ਹਾਲਤ 'ਚ ਤੀਜੇ ਦੇਸ਼ ਦੀਆਂ ਚਿੰਤਾਵਾਂ ਤੇ ਸੁਝਾਆਂ 'ਤੇ ਅਮਲ ਕਰਨ 'ਚ ਫ਼ਰਕ ਹੈ।

ਇਹ ਸਾਫ਼ ਹੈ ਕਿ ਹੁਣ ਭਾਰਤ ਪਾਕਿਸਤਾਨ ਨੂੰ ਇਸ ਕਦਰ ਦਬਾਅ 'ਚ ਰੱਖਣਾ ਚਾਹੁੰਦਾ ਹੈ ਕਿ ਉਹ ਜ਼ਰੂਰਤ ਤੋਂ ਜ਼ਿਆਦਾ ਜੁਅੱਰਤ ਨਾ ਦਿਖਾ ਸਕੇ। ਪੁਲਵਾਮਾ ਅੱਤਵਾਦੀ ਹਮਲੇ ਤੋਂ ਬਾਅਦ ਭਾਰਤੀ ਕੂਟਨੀਤਕਾਂ ਨੇ ਬਹੁਤ ਹੀ ਪ੍ਰਪੱਕ ਪ੍ਰਤੀਕਿਰਿਆ ਦਿੱਤੀ। ਉਨ੍ਹਾਂ ਵੱਲੋਂ ਇਹ ਕਹਿਣਾ ਕਾਫ਼ੀ ਮਾਅਨੇ ਰੱਖਦਾ ਹੈ ਕਿ ਬਾਲਾਕੋਟ 'ਚ ਹੋਈ ਕਾਰਵਾਈ ਪਾਕਿਸਤਾਨ ਖ਼ਿਲਾਫ਼ ਨਹੀਂ ਸਗੋਂ ਇੱਥੇ ਪਲ ਰਹੇ ਅੱਤਵਾਦੀਆਂ ਖ਼ਿਲਾਫ਼ ਸੀ। ਇਸ ਨਾਲ ਆਲਮੀ ਭਾਈਚਾਰੇ ਨੂੰ ਇਹ ਅਹਿਸਾਸ ਹੋ ਗਿਆ ਹੋਵੇਗਾ ਕਿ ਭਾਰਤੀ ਜਨਤਾ ਹੁਣ ਹੋਰ ਜ਼ਿਆਦਾ ਪਾਕਿਸਤਾਨੀ ਅੱਤਵਾਦ ਨੂੰ ਸਹਿਣ ਨਹੀਂ ਕਰੇਗੀ, ਲਿਹਾਜ਼ਾ ਪਾਕਿਸਤਾਨ 'ਤੇ ਇਸ ਗੱਲ ਲਈ ਦਬਾਅ ਪਾਇਆ ਜਾਣਾ ਚਾਹੀਦਾ ਹੈ ਕਿ ਉਹ ਅੱਤਵਾਦ ਦਾ ਰਸਤਾ ਛੱਡੇ। ਹਾਲਾਂਕਿ ਇਹ ਆਸਾਨ ਨਹੀਂ ਹੋਵੇਗਾ ਕਿਉਂਕਿ ਚੀਨ ਪਾਕਿਸਤਾਨ ਨੂੰ ਹਮਾਇਤ ਜਾਰੀ ਰੱਖੇਗਾ ਤੇ ਉਸ ਨੂੰ ਮੁਸ਼ਕਲ ਹਾਲਾਤ 'ਚੋਂ ਉਭਾਰਦਾ ਰਹੇਗਾ। ਫਿਲਹਾਲ ਇਸ ਨਾਲ ਇਕ ਗੱਲ ਸਪੱਸ਼ਟ ਹੋ ਜਾਂਦੀ ਹੈ ਕਿ ਇਲਾਕੇ 'ਚ ਸ਼ਾਂਤੀ ਤੇ ਸੁਰੱਖਿਆ ਦਾ ਮਾਹੌਲ ਬਣਾਈ ਰੱਖਣ ਦੀ ਜ਼ਿੰਮੇਵਾਰੀ ਹੁਣ ਪਾਕਿਸਤਾਨ ਦੀ ਹੈ।

27 ਫਰਵਰੀ ਤੋਂ ਬਾਅਦ ਦੇ ਘਟਨਾਕ੍ਰਮ ਦਾ ਪਾਕਿਸਤਾਨ ਨੇ ਕਾਫ਼ੀ ਤੇਜ਼ੀ ਨਾਲ ਪ੍ਰਚਾਰ ਕੀਤਾ। ਉਸ ਨੇ ਦੋ ਭਾਰਤੀ ਪਾਇਲਟਾਂ ਨੂੰ ਫੜੇ ਜਾਣ ਦਾ ਵੀ ਖੁਲਾਸਾ ਕੀਤਾ। ਬਾਅਦ 'ਚ ਉਸ ਨੇ ਆਪਣੇ ਪਿਛਲੇ ਦਾਅਵੇ ਦੇ ਉਲਟ ਸਿਰਫ਼ ਇਕ ਪਾਇਲਟ ਦੇ ਕਬਜ਼ੇ 'ਚ ਹੋਣ ਦੀ ਗੱਲ ਸਵੀਕਾਰੀ। ਭਾਰਤੀ ਅਧਿਕਾਰੀ ਕਈ ਘੰਟਿਆਂ ਤਕ ਮੌਨ ਰਹੇ ਤੇ ਫਿਰ ਬਾਅਦ 'ਚ ਸਿਰਫ਼ ਇਕ ਗੂੜ ਬਿਆਨ ਜਾਰੀ ਕੀਤਾ। ਇਸ ਨਾਲ ਪਾਕਿਸਤਾਨ ਨੂੰ ਆਪਣੀ ਗੱਲ ਦੁਨੀਆ ਭਰ 'ਚ ਪਹੁੰਚਾਉਣ 'ਚ ਮਦਦ ਮਿਲੀ। ਸੋਸ਼ਲ ਮੀਡੀਆ ਤੇ ਸੂਚਨਾ ਕ੍ਰਾਂਤੀ ਦੇ ਇਸ ਦੌਰ 'ਚ ਅਜਿਹੀ ਚੁੱਪੀ ਧਾਰਨ ਨੂੰ ਚੰਗਾ ਨਹੀਂ ਮੰਨਿਆ ਜਾਂਦਾ। ਭਾਰਤ ਨੂੰ ਹਾਲੇ ਆਪਣੀ ਸੂਚਨਾ ਰਣਨੀਤੀ ਨੂੰ ਹੋਰ ਜ਼ਿਆਦਾ ਧਾਰ ਦੇਣੀ ਪਵੇਗੀ। ਸਾਡਾ ਦੇਸ਼ ਏਨਾ ਪ੍ਰਪੱਕ ਹੈ ਕਿ ਉਹ ਕਿਸੇ ਵੀ ਬੁਰੀ ਖ਼ਬਰ ਨੂੰ ਹੌਸਲੇ ਨਾਲ ਸੁਣ ਕੇ ਸਹਿਣ ਕਰ ਸਕੇ।

ਇਹ ਘਟਨਾ ਉਸ ਸਮੇਂ ਵਾਪਰੀ ਜਦੋਂ ਦੇਸ਼ 'ਚ ਆਮ ਚੋਣਾਂ ਹੋਣ ਵਾਲੀਆਂ ਹਨ। ਅਜਿਹੇ ਸਮੇਂ 'ਚ ਇਹ ਬਿਹਤਰ ਹੁੰਦਾ ਕਿ ਸਿਆਸੀ ਵਰਗ ਕੌਮੀ ਸੁਰੱਖਿਆ ਦੇ ਮੁੱਦੇ 'ਤੇ ਇਕ ਸੁਰ 'ਚ ਬੋਲਦਾ ਪਰ ਅਜਿਹਾ ਹੋ ਨਾ ਸਕਿਆ। ਭਾਜਪਾ ਤੇ ਵਿਰੋਧੀ ਧਿਰ, ਦੋਵੇਂ ਇਸ ਘਟਨਾਕ੍ਰਮ ਤੋਂ ਸਿਆਸੀ ਲਾਹਾ ਲੈਣ ਦੀ ਮਨਸ਼ਾ ਨਾਲ ਆਪੋ- ਆਪਣੀ ਤਰ੍ਹਾਂ ਨਾਲ ਵਿਆਖਿਆ ਕਰ ਰਹੀਆਂ ਹਨ ਜਦਕਿ ਇਨ੍ਹਾਂ ਤੋਂ ਉਮੀਦ ਸੀ ਕਿ ਉਹ ਦੇਸ਼ਹਿੱਤ ਨੂੰ ਧਿਆਨ 'ਚ ਰੱਖਣਗੇ। ਨਿਸ਼ਚਿਤ ਤੌਰ 'ਤੇ ਸਰਕਾਰ ਦੀ ਕਾਰਵਾਈ ਦੀ ਜਾਂਚ-ਪਰਖ ਹੋਣੀ ਚਾਹੀਦੀ ਹੈ ਪਰ ਇਹ ਇਸ ਢੰਗ ਨਾਲ ਨਹੀਂ ਕੀਤੀ ਜਾਣੀ ਚਾਹੀਦੀ ਕਿ ਇਸ ਨਾਲ ਭਾਰਤ ਦੇ ਦੁਸ਼ਮਣਾਂ ਨੂੰ ਫ਼ਾਇਦਾ ਪਹੁੰਚੇ। ਹੋਰਨਾਂ ਜਮਹੂਰੀ ਦੇਸ਼ਾਂ ਦੀ ਤਰ੍ਹਾਂ ਭਾਰਤ 'ਚ ਵੀ ਜਵਾਬਦੇਹੀ ਦੀ ਪ੍ਰਣਾਲੀ ਸਥਾਪਤ ਕੀਤੀ ਜਾਣੀ ਚਾਹੀਦੀ ਹੈ ਤਾਂ ਕਿ ਅਜਿਹੇ ਮਾਮਲਿਆਂ ਨੂੰ ਗੁਪਤ ਰੱਖਣਾ ਯਕੀਨੀ ਬਣਾਇਆ ਜਾ ਸਕੇ। ਭਾਰਤ ਨੂੰ ਇਸ ਪ੍ਰਣਾਲੀ ਦਾ ਅਧਿਐਨ ਕਰਨਾ ਚਾਹੀਦਾ ਹੈ ਤੇ ਇਸ ਨੂੰ ਆਪਣੇ ਸਿਆਸੀ ਸਿਸਟਮ 'ਚ ਲਾਗੂ ਕਰਨਾ ਚਾਹੀਦਾ ਹੈ। ਉਮੀਦ ਹੈ ਕਿ ਲੋਕ ਸਭਾ ਚੋਣਾਂ ਤੋਂ ਬਾਅਦ ਨਵੀਂ ਸਰਕਾਰ ਇਸ ਮਾਮਲੇ ਨੂੰ ਗੰਭੀਰਤਾ ਨਾਲ ਦੇਖੇਗੀ। ਭਾਰਤ ਨੂੰ ਪਾਕਿਸਤਾਨ ਨਾਲ ਗੱਲਬਾਤ ਨਾ ਕਰਨ ਦੀ ਗੱਲ 'ਤੇ ਉਦੋਂ ਤਕ ਅਡੋਲ ਰਹਿਣਾ ਚਾਹੀਦਾ ਹੈ ਜਦੋਂ ਤਕ ਕਿ ਉਹ ਅੱਤਵਾਦ ਦਾ ਰਸਤਾ ਸੱਚਮੁੱਚ ਨਹੀਂ ਛੱਡ ਦਿੰਦਾ। ਉਸ ਨੂੰ ਪਾਕਿਸਤਾਨ 'ਚ ਅੱਤਵਾਦੀਆਂ ਦੀ ਗ੍ਰਿਫ਼ਤਾਰੀ ਦੀ ਦਿਖਾਵੇ ਵਾਲੀ ਕਾਰਵਾਈ 'ਤੇ ਭਰੋਸਾ ਨਹੀਂ ਕਰਨਾ ਚਾਹੀਦਾ।

ਵਿਵੇਕ ਕਾਟਜੂ

ਲੇਖਕ ਵਿਦੇਸ਼ ਮੰਤਰਾਲੇ 'ਚ ਸਕੱਤਰ ਰਹੇ ਹਨ।

ਅਜੋਕੀ ਨੌਜਵਾਨ ਪੀੜ੍ਹੀ ਕਲਾ ਤੇ ਸਾਹਿਤ ਤੋਂ ਵਾਂਝੀ ਹੈ। ਅੱਜ ਜੇ ਕੋਈ ਕਲਾ ਤੇ ਸਾਹਿਤ ਵੱਲ ਝੁਕਾਅ ਕਰਦਾ ਹੈ ਤਾਂ ਸਿਰਫ਼ ਰੋਜ਼ੀ -ਰੋਟੀ ਲਈ ਨਾ ਕਿ ਖ਼ੁਦ ਨੂੰ ਲੱਭਣ ਲਈ। ਕਲਾ ਤੇ ਸਾਹਿਤ 'ਚ ਮਨੁੱਖ ਵੱਲੋਂ ਆਪਣੇ -ਆਪ ਨੂੰ ਲੱਭਣ ਦੀ ਕੋਸ਼ਿਸ਼ ਨਾਲ ਹੀ ਉਸ ਨੂੰ ਆਪਣੀ ਹੋਂਦ ਬਾਰੇ ਪਤਾ ਲੱਗਦਾ ਹੈ, ਜਿਸ ਨਾਲ ਉਹ ਪੂਰਨ ਬੁੱਧੀਜੀਵੀ ਬਣਦਾ ਹੈ ਪਰ ਅਫ਼ਸੋਸ ਅੱਜ ਜ਼ਿਆਦਾਤਰ ਮੁੰਡੇ -ਕੁੜੀਆਂ ਆਪਣੇ ਜੀਵਨ ਦਾ ਮਕਸਦ ਸਿਰਫ਼ ਨੌਕਰੀ ਹਾਸਲ ਕਰਨਾ ਹੀ ਬਣਾ ਲੈਂਦੇ ਹਨ। ਉਹ ਕਿਸੇ ਪੂੰਜੀਪਤੀ ਜਾਂ ਸਰਕਾਰਾਂ ਲਈ ਕਿਸੇ ਮਸ਼ੀਨਰੀ ਵਾਂਗ ਆਪਣੀ ਜ਼ਿੰਦਗੀ ਦਾ ਅਨਮੋਲ ਸਮਾਂ ਭੇਂਟ ਕਰ ਦਿੰਦੇ ਹਨ। ਨਾ ਉਹ ਆਪਣੇ ਆਪ ਨੂੰ ਸਮਾਂ ਦੇ ਪਾਉਂਦੇ ਹਨ ਤੇ ਨਾ ਆਪਣੇ ਦੋਸਤਾਂ ਤੇ ਪਰਿਵਾਰ ਨੂੰ।

ਕਲਾ ਤੇ ਸਾਹਿਤ ਤੋਂ ਦੂਰ ਉਹ ਪੂੰਜੀਪਤੀਆਂ ਤੇ ਸਿਆਤਸਦਾਨਾਂ ਵੱਲੋਂ ਤਿਆਰ ਕੀਤੇ ਅਜਿਹੇ ਮਾਰੂਥਲ 'ਚ ਪਹੁੰਚ ਜਾਂਦੇ ਹਨ, ਜਿੱਥੇ ਉਨ੍ਹਾਂ ਨੂੰ ਪਾਣੀ ਦੀ ਭਾਲ ਹੁੰਦੀ ਹੈ ਤੇ ਪਾਣੀ ਦੀਆਂ ਕੁਝ ਬੂੰਦਾਂ ਉਨ੍ਹਾਂ ਨੂੰ ਇਸ ਤਰ੍ਹਾਂ ਦਿੱਤੀਆਂ ਜਾਂਦੀਆਂ ਹਨ ਕਿ ਬਸ ਉਹ ਜ਼ਿੰਦਾ ਰਹਿ ਸਕਣ। ਅੰਤ 'ਚ ਮਨੁੱਖੀ ਜ਼ਿੰਦਗੀ ਖ਼ਤਮ ਹੋ ਜਾਂਦੀ ਹੈ। ਕਲਾ ਤੇ ਸਾਹਿਤ ਜੋ ਉਨ੍ਹਾਂ ਨੂੰ ਜ਼ਿੰਦਗੀ ਦਾ ਅਹਿਸਾਸ ਕਰਵਾ ਦਿੰਦੈ, ਜੋ ਉਨ੍ਹਾਂ ਦੀ ਜ਼ਿੰਦਗੀ 'ਚ ਕੁਝ ਖੁਸ਼ੀਆਂ ਭਰ ਦਿੰਦੈ, ਜੋ ਸਭਿਆਚਾਰ ਤੇ ਆਉਣ ਵਾਲੀਆਂ ਪੀੜੀ੍ਹਆਂ ਨੂੰ ਬੇਸ਼ਕੀਮਤੀ ਖ਼ਜ਼ਾਨਾ ਦੇ ਦਿੰਦੈ , ਉਨ੍ਹਾਂ ਤੋਂ ਉਹ ਵਾਂਝੇ ਰਹਿ ਜਾਂਦੇ ਹਨ। ਜ਼ਿਆਦਾਤਰ ਪੂੰਜੀਪਤੀ ਤੇ ਸਿਆਤਸਤਦਾਨ ਤਾਂ ਡਰਪੋਕ, ਬੁੱਧੂ ਤੇ ਸਵਾਰਥੀ ਹੁੰਦੇ ਹਨ। ਇਨ੍ਹਾਂ 'ਚ ਖੁਸ਼ਕ ਜ਼ਮੀਨ 'ਤੇ ਬੀਜ ਉਗਾਉਣ ਦੀ ਹਿੰਮਤ ਨਹੀਂ ਤੇ ਨਾ ਹੀ ਇਨ੍ਹਾਂ 'ਚ ਉਮੀਦਾਂ ਤੇ ਕਾਮਯਾਬੀ ਦੇ ਖੰਭ ਲਾ ਕੇ ਉਡਾਰੀ ਲਾਉਣ ਦੀ ਚਾਹਤ ਹੀ ਹੈ। ਇਨ੍ਹਾਂ ਵੱਲੋਂ ਬਣਾਈ ਦੁਨੀਆਂ ਕਿਸੇ ਬੰਜਰ ਸ਼ਾਮਲਾਟ ਵਾਂਗ ਹੈ , ਜਿੱਥੇ ਕੋਈ ਪੌਦਾ ਸਹੀ ਢੰਗ ਨਾਲ ਉÎੱਗ ਹੀ ਨਹੀਂ ਸਕਦਾ ਪਰ ਕਲਾ ਤੇ ਸਾਹਿਤ ਮਨੁੱਖ ਦੀ ਜ਼ਿੰਦਗੀ 'ਚ ਅਜਿਹਾ ਕੁਝ ਦਿੰਦੇ ਹਨ, ਜਿਸ ਨਾਲ ਉਸ ਦੀ ਜ਼ਿੰਦਗੀ ਕਿਸੇ ਫੁੱਲਾਂ ਨਾਲ ਭਰੇ ਹਰੇ ਬਗੀਚੇ ਵਾਂਗ ਮਹਿਕਾਂ ਬਿਖੇਰਦੀ ਹੈ। ਅਸੀਂ ਇਕ ਮਹਿੰਗੀ ਦੁਨੀਆ 'ਚ ਸਸਤੇ ਮਜ਼ਦੂਰ ਬਣ ਕੇ ਮਰ ਜਾਂਦੇ ਹਾਂ ਤੇ ਆਪਣੀ ਆਉਣ ਵਾਲੀ ਪੀੜ੍ਹੀ ਨੂੰ ਵੀ ਉਸੇ ਖਤਾਨ 'ਚ ਧਕੇਲ ਦਿੰਦੇ ਹਾਂ , ਜਿਸ 'ਚੋਂ ਅਸੀਂ ਖ਼ੁਦ ਬਾਹਰ ਨਹੀਂ ਆ ਸਕੇ। ਮੇਰੀ ਅੱਜ ਦੇ ਨੌਜਵਾਨਾਂ ਨੂੰ ਇਹੋ ਬੇਨਤੀ ਹੈ ਕਿ ਉਹ ਕਲਾ ਤੇ ਸਾਹਿਤ ਨੂੰ ਆਪਣੀ ਜ਼ਿੰਦਗੀ ਦਾ ਹਿੱਸਾ ਬਣਾਉਣ। ਇਸ ਲਈ ਉਨ੍ਹਾਂ ਨੂੰ ਆਪਣੇ ਪਰਿਵਾਰ ਨੂੰ ਸਮਝਾ ਕੇ ਉਨ੍ਹਾਂ ਦਾ ਸਹਿਯੋਗ ਹਾਸਲ ਕਰਨਾ ਚਾਹੀਦਾ ਹੈ। ਉਹ ਪੂੰਜੀਪਤੀਆਂ ਤੇ ਸਿਆਸਤਦਾਨਾਂ ਵੱਲੋਂ ਬਣਾਈ ਗਈ ਦੁਨੀਆ 'ਚ ਗੁਆਚਣੇ ਨਹੀਂ ਚਾਹੀਦੇ। ਉਨ੍ਹਾਂ ਨੂੰ ਕਲਪਨਾ ਦੇ ਖੰਭ ਲਗਾ ਕੇ ਉੱਡਣਾ ਆਉਣਾ ਚਾਹੀਦੈ। ਯਾਦ ਰੱਖੋ ਕਿ ਅੱਜ ਤਕ ਜਿੰਨੀਆਂ ਵੀ ਖੋਜਾਂ ਹੋਈਆਂ ਹਨ , ਉਹ ਕਿਸੇ ਪੂੰਜੀਪਤੀ ਜਾਂ ਸਿਆਸਤਦਾਨ ਨੇ ਨਹੀਂ ਕੀਤੀਆਂ ਸਗੋਂ ਇਹ ਸਭ ਸਾਡੇ ਦੇਸ਼ ਦੇ ਨੌਜਵਾਨਾਂ ਦੇ ਹੌਸਲੇ ਤੇ ਮਿਹਨਤ ਦੀ ਹੀ ਦੇਣ ਹੈ।

ਹਰਪ੍ਰੀਤ ਸਿੰਘ ਬਰਾੜ, ਬਠਿੰਡਾ।

ਅੱਜ ਦੀ gRih ਸਥਿਤੀ : 11 ਮਾਰਚ 2019, ਸੋਮਵਾਰ, ਫੱਗਣ ਮਹੀਨਾ, ਸ਼ੁਕਲ ਪੱਖ, ਪੰਚਮੀ ਦਾ ਰਾਸ਼ੀਫਲ।

ਅੱਜ ਦਾ ਰਾਹੂਕਾਲ : ਸਵੇਰੇ 7.30 ਵਜੇ ਤੋਂ ਸਵੇਰੇ 09.00 ਵਜੇ ਤਕ।

ਅੱਜ ਤੇ ਕੱਲ੍ਹ ਦਾ ਦਿਸ਼ਾਸ਼ੂਲ : ਪੂਰਬ ਤੇ ਉੱਤਰ।

ਅੱਜ ਦਾ ਪੁਰਬ : ਸੋਮਵਤੀ ਪੰਚਮੀ।

ਕੱਲ ਦਾ ਪੁਰਬ : ਗੌ ਰੂਪਣੀ ਸ਼ਛਠੀ।

ਕੱਲ੍ਹ 12 ਮਾਰਚ, 2019 ਦਾ ਪੰਚਾਂਗ : ਸੰਵਤ ਵਿਰੋਧਕ੍ਰਿਤ 2075, ਸ਼ਕੇ 1940, ਉੱਤਰਾਇਨ, ਦੱਖਣ ਗੋਲ, ਸ਼ਿਸ਼ਿਰ ਰੁੱਤ, ਫੱਗਣ ਮਹੀਨਾ, ਸ਼ੁਕਲ ਪੱਖ, ਸ਼ਛਠੀ 28 ਘੰਟੇ 50 ਮਿੰਟ ਤਕ ਮਗਰੋਂ ਸਪਤਮੀ, ਕ੍ਰਿਤਿਕਾ ਨਛੱਤਰ 28 ਘੰਟੇ 53 ਮਿੰਟ ਤਕ ਮਗਰੋਂ ਰੋਹਿਣੀ ਨਛੱਤਰ, ਵੈਧਿ੍ਤ ਯੋਗ 15 ਘੰਟੇ 13 ਮਿੰਟ ਤਕ ਮਗਰੋਂ ਵਿਸ਼ਕੁੰਭ ਯੋਗ, ਮੇਖ 'ਚ ਚੰਦਰਮਾ 10 ਘੰਟੇ 23 ਮਿੰਟ ਮਗਰੋਂ ਬਿ੍ਖ 'ਚ।

ਮੇਖ : ਆਰਥਿਕ ਸਥਿਤੀ 'ਚ ਸੁਧਾਰ ਹੋਵੇਗਾ। ਪਰਿਵਾਰਕ ਜ਼ਿੰਮੇਵਾਰੀ ਦੀ ਪੂਰਤੀ ਹੋਵੇਗੀ। ਕਾਰੋਬਾਰੀ ਵੱਕਾਰ ਵਧੇਗਾ। ਧਨ, ਯਸ਼, ਕੀਰਤ 'ਚ ਵਾਧਾ।

ਬਿ੍ਖ : ਭਾਵੁਕਤਾ 'ਤੇ ਕਾਬੂ ਰੱਖੋ। ਪਰਿਵਾਰਕ ਜ਼ਿੰਮੇਵਾਰੀ ਦੀ ਪੂਰਤੀ ਹੋਵੇਗੀ। ਆਰਥਿਕ ਪੱਖ ਮਜ਼ਬੂਤ ਹੋਵੇਗਾ। ਘਰੇਲੂ ਕਾਰਜਾਂ 'ਚ ਮਸਰੂਫ ਰਹੋਗੇ। ਸਬੰਧਾਂ 'ਚ ਨੇੜਤਾ ਆਵੇਗੀ।

ਮਿਥੁਨ : ਰਿਸ਼ਤਿਆਂ 'ਚ ਮਿਠਾਸ ਆਵੇਗੀ, ਪਰ ਸਰਕਾਰੀ ਮੁਲਾਜ਼ਮ ਤੋਂ ਪਰੇਸ਼ਾਨੀ ਮਿਲ ਸਕਦੀ ਹੈ। ਸੰਤਾਨ ਦੀ ਜ਼ਿੰਮੇਵਾਰੀ ਦੀ ਪੂਰਤੀ 'ਚ ਸਫਲਤਾ ਮਿਲੇਗੀ।

ਕਰਕ : ਸਹੁਰੇ ਪੱਖ ਤੋਂ ਤਣਾਅ ਮਿਲੇਗਾ। ਕਾਰੋਬਾਰੀ ਯੋਜਨਾ 'ਚ ਵਾਧਾ ਹੋਵੇਗਾ। ਬੁੱਧੀ ਕੌਸ਼ਲ ਨਾਲ ਕੀਤਾ ਕੰਮ ਸੰਪੰਨ ਹੋਵੇਗਾ। ਪਹਾੜੀ ਇਲਾਕੇ 'ਚ ਯਾਤਰਾ ਦੀ ਸੰਭਾਵਨਾ।

ਸਿੰਘ : ਰਚਨਾਤਮਕ ਯਤਨਾਂ 'ਚ ਵਾਧਾ ਹੋਵੇਗਾ। ਸਮਾਜਕ ਵੱਕਾਰ ਵਧੇਗਾ ਪਰ ਗੁਆਂਢੀ ਜਾ ਭਰਾ ਨਾਲ ਵਿਚਾਰਕ ਮਤਭੇਦ ਵੀ ਹੋ ਸਕਦੇ ਹਨ।

ਕੰਨਿਆ : ਪਰਿਵਾਰਕ ਜੀਵਨ ਸੁਖੀ ਹੋਵੇਗਾ। ਆਰਥਿਕ ਪੱਖ ਮਜ਼ਬੂਤ ਹੋਵੇਗਾ। ਘਰੇਲੂ ਵਰਤੋਂ ਦੀਆਂ ਵਸਤਾਂ 'ਚ ਵਾਧਾ ਹੋਵੇਗਾ। ਰੁਜ਼ਗਾਰ ਦੇ ਖੇਤਰ 'ਚ ਤਰੱਕੀ ਹੋਵੇਗੀ। ਵਿਗੜੇ ਕੰਮ ਬਣਨਗੇ।

ਤੁਲਾ : ਸ਼ਾਸਨ ਸੱਤਾ ਦਾ ਸਹਿਯੋਗ ਮਿਲੇਗਾ। ਕਾਰੋਬਾਰੀ ਯੋਜਨਾ 'ਚ ਵਾਧਾ ਹੋਵੇਗਾ। ਰਚਨਾਤਮਕ ਯਤਨਾਂ 'ਚ ਵਾਧਾ ਹੋਵੇਗਾ।

ਬਿ੍ਸ਼ਚਕ : ਪਰਿਵਾਰਕ ਵੱਕਾਰ ਵਧੇਗਾ। ਆਰਥਿਕ ਪੱਖ ਮਜ਼ਬੂਤ ਹੋਵੇਗਾ। ਦੂਜਿਆਂ ਤੋਂ ਸਹਿਯੋਗ ਲੈਣ 'ਚ ਸਫਲਤਾ ਮਿਲੇਗੀ, ਪਰ ਹੰਕਾਰ ਕਾਰਨ ਵਿਵਾਦ ਦੀ ਸਥਿਤੀ ਆ ਸਕਦੀ ਹੈ।

ਧਨੁ : ਸਮਾਜਕ ਕਾਰਜਾਂ 'ਚ ਰੁਚੀ ਲਵੋਗੇ। ਆਰਥਿਕ ਪੱਖ ਮਜ਼ਬੂਤ ਹੋਵੇਗਾ। ਰਿਸ਼ਤਿਆਂ 'ਚ ਨੇੜਤਾ ਆਵੇਗੀ। ਤੁਹਾਡੇ ਪ੍ਭਾਵ 'ਚ ਵਾਧਾ ਹੋਵੇਗਾ।

ਮਕਰ : ਕਾਰੋਬਾਰੀ ਯੋਜਨਾ 'ਚ ਵਾਧਾ ਹੋਵੇਗਾ। ਸਮਾਜਕ ਕਾਰਜਾਂ 'ਚ ਰੁਚੀ ਲਵੋਗੇ। ਪਰਿਵਾਰਕ ਵੱਕਾਰ ਵਧੇਗਾ। ਆਰਥਿਕ ਪੱਖ ਮਜ਼ਬੂਤ ਹੋਵੇਗਾ।

ਕੁੰਭ : ਧਨ, ਯਸ਼, ਕੀਰਤੀ 'ਚ ਵਾਧਾ ਹੋਵੇਗਾ। ਸ਼ਾਸਨ ਸੱਤਾ ਦਾ ਸਹਿਯੋਗ ਰਹੇਗਾ। ਪਰਿਵਾਰਕ ਜ਼ਿੰਮੇਵਾਰੀ ਦੀ ਪੂਰਤੀ ਹੋਵੇਗੀ। ਕਾਰੋਬਾਰ 'ਚ ਤਰੱਕੀ ਹੋਵੇਗੀ।

ਮੀਨ : ਸਬੰਧਤ ਅਧਿਕਾਰੀ ਤੋਂ ਸਹਿਯੋਗ ਮਿਲੇਗਾ। ਦੌੜ ਭੱਜ ਦੀ ਸਥਿਤੀ ਸੁਖਦ ਹੋਵੇਗੀ। ਰਚਨਾਤਮਕ ਕਾਰਜਾਂ 'ਚ ਤਰੱਕੀ ਹੋਵੇਗੀ। ਸ਼ਾਸਨ ਸੱਤਾ ਦਾ ਸਹਿਯੋਗ ਮਿਲੇਗਾ। ਯਾਤਰਾ ਦੀ ਸੰਭਾਵਨਾ।

ਮਨੁੱਖ ਵਰਗੇ ਵਿਕਸਤ ਪ੍ਰਾਣੀ ਲਈ ਸੁੱਖ ਪ੍ਰਾਪਤੀ ਦੀ ਲਾਲਸਾ ਸੁਭਾਵਿਕ ਹੈ। ਸੁੱਖ ਪ੍ਰਾਪਤੀ ਦੀ ਖਾਹਿਸ਼ ਹਰੇਕ ਮਨੁੱਖ ਕਰਦਾ ਹੈ। ਉਹ ਜੀਵਨ ਰੂਪੀ ਘੜੀ ਦੀ ਸੂਈ ਦੀ ਤਰ੍ਹਾਂ ਕਿਰਿਆਸ਼ੀਲ ਰਹਿੰਦਾ ਹੈ। ਇੰਜ ਨਾ ਕਰਨ ਵਾਲਾ ਮਨੁੱਖ ਜ਼ਿੰਦਾ ਹੁੰਦਾ ਹੋਇਆ ਵੀ ਮੋਇਆਂ ਬਰਾਬਰ ਹੈ।

ਸੁੱਖ ਦਾ ਆਧਾਰ ਮਨੁੱਖ ਦੀ ਮਨੋਭੂਮੀ 'ਤੇ ਆਧਾਰਿਤ ਹੈ। ਵੱਖ-ਵੱਖ ਮਨੋਦਸ਼ਾ ਵਾਲੇ ਮਨੁੱਖਾਂ ਵਿਚ ਸੁੱਖ ਦੀਆਂ ਸਮੱਗਰੀਆਂ ਵੀ ਵੱਖ-ਵੱਖ ਹੁੰਦੀਆਂ ਹਨ। ਨਸ਼ਾ ਕਰਨ ਵਾਲੇ ਮਨੁੱਖ ਲਈ ਨਸ਼ਾ ਸੁੱਖ ਪ੍ਰਦਾਨ ਕਰਦਾ ਹੈ ਪਰ ਜੋ ਨਸ਼ੇ ਦੇ ਨੁਕਸਾਨਾਂ ਤੋਂ ਜਾਣੂ ਹੁੰਦੇ ਹਨ, ਉਹ ਉਸ ਤੋਂ ਦੂਰ ਰਹਿਣ ਨੂੰ ਹੀ ਸੁੱਖ ਸਮਝਦੇ ਹਨ। ਪ੍ਰਭੂ ਨੇ ਜਿੰਨੀਆਂ ਸੁੱਖ-ਸਹੂਲਤਾਂ ਇਨਸਾਨ ਨੂੰ ਪ੍ਰਦਾਨ ਕੀਤੀਆਂ ਹਨ, ਹੋਰ ਕਿਸੇ ਜੀਵ ਨੂੰ ਨਹੀਂ।

ਵਿਅਕਤੀ ਸਬਰ ਨਾਲ ਆਪਣੀ ਸਮਰੱਥਾ ਤੇ ਪ੍ਰਾਪਤੀਆਂ ਦੀ ਵਰਤੋਂ ਪਰਮਾਤਮਾ ਦੀ ਸਾਜੀ ਸ੍ਰਿਸ਼ਟੀ ਨੂੰ ਸੁੰਦਰ-ਸੁਖੀ ਤੇ ਖ਼ੁਸ਼ਹਾਲ ਬਣਾਉਣ ਵਿਚ ਕਰੇ। ਇਸੇ ਤਰ੍ਹਾਂ ਵਿਅਕਤੀ ਤੇ ਪਸ਼ੂ ਵਿਚਾਲੇ ਹੱਦ ਤੈਅ ਹੈ। ਫਿਰ ਹੀ ਤਾਂ ਮਨੁੱਖੀ ਜੀਵਨ ਦੀ ਸਾਰਥਿਕਤਾ ਸਿੱਧ ਹੁੰਦੀ ਹੈ। ਭੋਗ ਤੋਂ ਸੁੱਖ ਪ੍ਰਾਪਤ ਹੁੰਦਾ ਹੈ , ਜੋ ਇੰਦਰੀਆਂ ਨੂੰ ਤ੍ਰਿਪਤ ਕਰਦਾ ਹੈ। ਇਹ ਪਲ ਭਰ ਦੀ ਤ੍ਰਿਪਤੀ ਅੱਗ ਵਿਚ ਘਿਓ ਪਾਉਣ ਦੇ ਬਰਾਬਰ ਹੁੰਦੀ ਹੈ।

ਭੁਲਾਵੇ ਵਿਚ ਭਟਕਣ ਵਾਲੀ ਇਹ ਇੰਦਰੀਆਂ ਤੋਂ ਪੈਦਾ ਹੋਈ ਵਾਸਨਾ ਇਕ ਛਲਾਵਾ ਹੈ। ਮਨੁੱਖ ਸਬਰ ਰੱਖਣ ਵਾਲਾ ਪ੍ਰਾਣੀ ਹੈ , ਜੋ ਅੰਤਰ ਆਤਮਾ ਦੀ ਆਵਾਜ਼ ਸੁਣਦਾ ਹੈ। ਉਸ ਨੂੰ ਸੱਚਾ ਸੁੱਖ ਸੇਵਾ ਤੇ ਸਾਧਨਾ ਵਿਚ ਹੀ ਮਿਲਦਾ ਹੈ। ਇਸ ਤੋਂ ਵਧ ਕੇ ਕੋਈ ਅਜਿਹਾ ਕੰਮ ਨਹੀਂ ਹੈ , ਜੋ ਮਨੁੱਖ ਨੂੰ ਉਸ ਦੀ ਮਾਣ-ਮਰਿਆਦਾ ਦਾ ਗਿਆਨ ਕਰਵਾਉਂਦਾ ਹੋਵੇ। ਮੇਰੇ ਕੋਲ ਢੁੱਕਵਾਂ ਭੋਜਨ ਹੈ, ਇਸ ਨਾਲ ਮੇਰੀ ਭੁੱਖ ਆਰਾਮ ਨਾਲ ਮਿਟ ਜਾਂਦੀ ਹੈ ਪਰ ਇਸ ਨਾਲ ਸਦਾ ਵਾਸਤੇ ਭੁੱਖ ਨਹੀਂ ਮਿਟ ਜਾਂਦੀ। ਮੇਰੇ ਤੋਂ ਵੀ ਵੱਧ ਭੁੱਖਾ ਕੋਈ ਹੈ ਅਤੇ ਉਸ ਨੂੰ ਦੋ ਰੋਟੀਆਂ ਜੇ ਦੇ ਦਿੱਤੀਆਂ ਜਾਣ ਤਾਂ ਭੁੱਖੇ ਦੀ ਆਤਮਾ ਦੀ ਤ੍ਰਿਪਤੀ ਦੇਖ ਕੇ ਜੋ ਆਨੰਦ ਪ੍ਰਾਪਤ ਹੋਵੇਗਾ, ਉਹੀ ਸੱਚਾ ਸੁੱਖ ਹੈ।

ਪ੍ਰਭੂ ਨੇ ਇਸੇ ਕਾਰਨ ਮਨੁੱਖ ਨੂੰ ਸਮਰੱਥਾ ਪ੍ਰਦਾਨ ਕੀਤੀ ਹੈ ਕਿ ਉਹ ਇੰਨਾ ਕਮਾ ਸਕਦਾ ਹੈ ਕਿ ਉਸ ਦੇ ਦਸਵੇਂ ਭਾਗ ਨਾਲ ਉਸ ਦੀਆਂ ਸਰੀਰਕ ਜ਼ਰੂਰਤਾਂ ਪੂਰੀ ਹੋ ਜਾਂਦੀਆਂ ਹਨ। ਬਾਕੀ ਹਿੱਸਾ ਜੇ ਉਹ ਸਮਾਜ ਦੇ ਹਿੱਤ 'ਚ ਲੋਕ ਭਲਾਈ ਲਈ ਇਸਤੇਮਾਲ ਕਰੇ ਜਿਸ ਦਾ ਕਿ ਉਹ ਬਹੁਤ ਰਿਣੀ ਹੈ, ਤਦੇ ਸੁੱਖ ਪਾ ਸਕਦਾ ਹੈ। ਸਮਾਜ ਦਾ ਕਰਜ਼ਾ ਉਤਾਰਨ ਲਈ ਜੇ ਅਸੀਂ ਕੋਸ਼ਿਸ਼ ਨਹੀਂ ਕਰਦੇ ਹਾਂ ਤਾਂ ਅਸੀਂ ਸੁਖੀ ਨਹੀਂ ਹੋ ਸਕਦੇ।

ਡਾ. ਵਿਜੇ ਪ੍ਰਕਾਸ਼ ਤ੍ਰਿਪਾਠੀ।

ਪੈਨ ਕਾਰਡ ਸਾਡੇ ਜ਼ਰੂਰੀ ਦਸਤਾਵੇਜ਼ਾਂ ਵਿਚੋਂ ਇਕ ਹੈ। ਇਨਕਮ ਟੈਕਸ ਰਿਟਰਨ ਭਰਨੀ ਹੋਵੇ ਜਾਂ ਫਿਰ ਬੈਂਕ ਵਿਚ ਖਾਤਾ ਖੁੱਲ੍ਹਵਾਉਣਾ ਹੋਵੇ, ਹਰ ਵਿੱਤੀ ਲੈਣ-ਦੇਣ ਲਈ ਪੈਨ ਕਾਰਡ ਦੀ ਜ਼ਰੂਰਤ ਪੈਂਦੀ ਹੀ ਹੈ। ਇੱਥੋਂ ਤਕ ਕਿ ਸਰਕਾਰ ਨੇ ਸ਼ਾਪਿੰਗ ਲਈ ਵੀ ਪੈਨ ਕਾਰਡ ਨੂੰ ਲਾਜ਼ਮੀ ਕਰ ਦਿੱਤਾ ਹੈ। ਪੈਨ ਕਾਰਡ ਇਕ ਅਜਿਹਾ ਦਸਤਾਵੇਜ਼ ਹੈ ਜੋ ਤੁਹਾਡੇ ਫਾਈਨੈਂਸ਼ੀਅਲ ਸਟੇਟਸ ਨੂੰ ਵੀ ਦਿਖਾਉਂਦਾ ਹੈ। ਜ਼ਰਾ ਸੋਚੋ, ਜੇਕਰ ਇੰਨਾ ਜ਼ਰੂਰੀ ਕਾਰਡ ਤੁਹਾਡੀ ਸਿਰਫ਼ ਇਕ ਗ਼ਲਤੀ ਦੀ ਵਜ੍ਹਾ ਨਾਲ ਰੱਦੀ ਹੋ ਗਿਆ ਤਾਂ...? ਜੀ ਹਾਂ ਇਹ ਮੁਮਕਿਨ ਹੈ, ਜੇਕਰ ਤੁਸੀਂ 31 ਮਾਰਚ 2019 ਤਕ ਆਪਣੇ ਪੈਨ ਕਾਰਡ ਨੂੰ ਆਧਾਰ ਕਾਰਡ ਨਾਲ ਲਿੰਕ ਨਹੀਂ ਕਰਵਾਇਆ ਤਾਂ ਇਹ ਜ਼ਰੂਰੀ ਦਸਤਾਵੇਜ਼ ਹਮੇਸ਼ਾ ਲਈ ਬੇਕਾਰ ਹੋ ਜਾਵੇਗਾ।

ਜ਼ਿਕਰਯੋਗ ਹੈ ਕਿ ਪਿਛਲੇ ਸਾਲ ਸਰਕਾਰ ਨੇ ਲਗਪਗ 11.44 ਲੱਖ ਪੈਨ ਕਾਰਡ ਜਾਂ ਤਾਂ ਬੰਦ ਕਰ ਦਿੱਤੇ ਹਨ ਜਾਂ ਫਿਰ ਉਨ੍ਹਾਂ ਨੂੰ ਨਕਾਰਾ ਕੈਟਾਗਰੀ ਵਿਚ ਪਾ ਦਿੱਤਾ ਹੈ। 31 ਮਾਰਚ ਦੀ ਮਿਆਦ ਦੱਸਣ ਤੋਂ ਬਾਅਦ ਆਧਾਰ-ਪੈਨ ਲਿੰਕ ਨਹੀਂ ਹੋਣ 'ਤੇ ਤੁਹਾਡੇ ਨਾਲ ਅਜਿਹਾ ਵੀ ਹੋ ਸਕਦਾ ਹੈ। ਇਹ ਆਖਰੀ ਮੌਕਾ ਹੈ ਜਦੋਂ ਤੁਸੀਂ ਆਪਣੇ ਪੈਨ ਕਾਰਡ ਨੂੰ ਰੱਦੀ ਹੋਣ ਤੋਂ ਬਚਾ ਸਕਦੇ ਹੋ। ਇਸ ਖ਼ਬਰ ਰਾਹੀਂ ਅਸੀਂ ਤੁਹਾਨੂੰ ਦੱਸ ਰਹੇ ਹਾਂ ਕਿ ਕਿਨ੍ਹਾਂ ਆਸਾਨ ਸਟੈੱਪਸ ਨੂੰ ਫਾਲੋ ਕਰ ਕੇ ਤੁਸੀਂ ਆਪਣਾ ਪੈਨ ਕਾਰਡ ਅਤੇ ਆਧਾਰ ਲਿੰਕ ਕਰ ਸਕਦੇ ਹੋ।

ਜ਼ਿਕਰਯੋਗ ਹੈ ਕਿ ਜੇਕਰ ਤੁਸੀਂ ਅਜੇ ਤਕ ਆਪਣੇ ਪੈਨ ਕਾਰਡ ਨੂੰ ਆਧਾਰ ਨਾਲ ਲਿੰਕ ਨਹੀਂ ਕੀਤਾ ਹੈ ਤਾਂ ਤੁਹਾਨੂੰ ਕਾਫ਼ੀ ਪਰੇਸ਼ਾਨੀ ਹੋ ਸਕਦੀ ਹੈ। ਇਨਕਮ ਟੈਕਸ ਐਕਟ ਦੀ ਧਾਰਾ 123AA ਤਹਿਤ ਤੁਹਾਡਾ ਪੈਨ ਇਨਵੈਲਿਡ ਮੰਨਿਆ ਜਾਵੇਗਾ। ਇੰਨਾ ਹੀ ਨਹੀਂ ਐਕਸਪਰਟਸ ਦੀ ਜੇਕਰ ਮੰਨੀਏ ਤਾਂ ਪੈਨ ਕਾਰਡ ਅਤੇ ਆਧਾਰ ਦੇ ਲਿੰਕ ਨਾ ਹੋਣ ਦੀ ਸਥਿਤੀ ਵਿਚ ਤੁਸੀਂ ਆਨਲਾਈਨ ITR ਫਾਈਲ ਨਹੀਂ ਕਰ ਸਕੋਗੇ। ਤੁਹਾਡਾ ਟੈਕਸ ਰਿਫੰਡ ਫਸ ਸਕਦਾ ਹੈ ਅਤੇ ਪੈਨ ਕਾਰਡ ਇਨਵੈਲਿਡ ਹੋ ਜਾਵੇਗਾ।

ਆਨਲਾਈਨ ਪੈਨ ਅਤੇ ਆਧਾਰ ਕਾਰਡ ਨੂੰ ਇੰਝ ਕਰ ਸਕਦੇ ਹੋ ਲਿੰਕ...

• ਸਭ ਤੋਂ ਪਹਿਲਾਂ ਜੇਕਰ ਤੁਹਾਡਾ ਅਕਾਉਂਟ ਨਹੀਂ ਬਣਿਆ ਹੈ ਤਾਂ ਪਹਿਲਾਂ ਖ਼ੁਦ ਨੂੰ ਰਜਿਸਟਰ ਕਰੋ।
• ਇਨਕਮ ਟੈਕਸ ਵਿਭਾਗ ਦੀ ਈ-ਫਾਈਲਿੰਗ ਵੈੱਬਸਾਈਟ (www.incometaxindiafilling.gov.in) 'ਤੇ ਜਾਓ।
  

• ਵੈੱਬਸਾਈਟ 'ਤੇ ਇਕ ਆਪਸ਼ਨ ਦਿਖਾਈ ਦੇਵੇਗੀ 'ਲਿੰਕ ਆਧਾਰ', ਇੱਥੇ ਕਲਿੱਕ ਕਰੋ।
  

• ਲਾਗਇਨ ਕਰਨ ਤੋਂ ਬਾਅਦ ਆਪਣੇ ਅਕਾਉਂਟ ਦੀ ਪ੍ਰੋਫਾਈਲ ਸੈਟਿੰਗ 'ਚ ਜਾਓ।
  

• ਪ੍ਰੋਫਾਈਲ ਸੈਟਿੰਗ ਵਿਚ ਤੁਹਾਨੂੰ ਆਧਾਰ ਕਾਰਡ ਲਿੰਕ ਕਰਨ ਦਾ ਆਪਸ਼ਨ ਦਿਸੇਗਾ, ਇਸ ਨੂੰ ਸਿਲੈਕਟ ਕਰੋ।
  

• ਇੱਥੇ ਦਿੱਤੇ ਗਏ ਸੈਕਸ਼ਨ ਵਿਚ ਆਪਣਾ ਆਧਾਰ ਨੰਬਰ ਅਤੇ ਕੈਪਚਾ ਕੋਡ ਭਰੋ।
  

• ਜਾਣਕਾਰੀ ਭਰਨ ਤੋਂ ਬਾਅਦ ਹੇਠਾਂ ਦਿਸ ਰਹੇ 'ਲਿੰਕ ਆਧਾਰ' ਆਪਸ਼ਨ 'ਤੇ ਕਲਿੱਕ ਕਰੋ।
  

• ਇੰਨਾ ਕਰਦਿਆਂ ਹੀ ਤੁਹਾਡਾ ਆਧਾਰ ਕਾਰਡ ਅਤੇ ਪੈਨ ਕਾਰਡ ਆਪਸ ਵਿਚ ਲਿੰਕ ਹੋ ਜਾਣਗੇ।
  

SMS ਰਾਹੀਂ ਵੀ ਕਰ ਸਕਦੇ ਓ ਲਿੰਕ...

ਕਿਸੇ ਕਾਰਨ ਜੇਕਰ ਤੁਸੀਂ ਆਨਲਾਈਨ ਪੈਨ ਕਾਰਡ ਨੂੰ ਲਿੰਕ ਨਹੀਂ ਕਰ ਪਾ ਰਹੋ ਤਾਂ ਦੂਸਰਾ ਤਰੀਕਾ ਵੀ ਹੈ। ਤੁਸੀਂ ਮੋਬਾਈਲ 'ਤੇ ਵੀ ਆਧਾਰ ਨੂੰ ਪੈਨ ਕਾਰਡ ਨਾਲ ਲਿੰਕ ਕਰ ਸਕਦੇ ਹੋ। ਤੁਹਾਨੂੰ ਐੱਸਐੱਮਐੱਸ ਜ਼ਰੀਏ ਆਪਣਾ ਪੈਨ ਆਧਾਰ ਨਾਲ ਲਿੰਕ ਕਰਵਾਉਣਾ ਪਵੇਗਾ। ਇਨਕਮ ਟੈਕਸ ਡਿਪਾਰਟਮੈਂਟ ਨੇ ਦੱਸਿਆ ਕਿ 567678 ਜਾਂ 56161 'ਤੇ ਐੱਸਐੱਮਐੱਸ ਭੇਜ ਕੇ ਆਧਾਰ ਨੂੰ ਪੈਨ ਨਾਲ ਲਿੰਕ ਕੀਤਾ ਜਾ ਸਕਦਾ ਹੈ।

ਜੋਧਪੁਰ : ਬਹੁਚਰਚਿਤ ਕਾਲੇ ਹਿਰਨ ਸ਼ਿਕਾਰ ਮਾਮਲੇ 'ਚ ਮੁਲਜ਼ਮ ਫਿਲਮੀ ਸਿਤਾਰਿਆਂ ਦੀਆਂ ਮੁਸ਼ਕਿਲਾਂ ਮੁੜ ਤੋਂ ਵਧ ਸਕਦੀਆਂ ਹਨ। ਰਾਜਸਥਾਨ ਸਰਕਾਰ ਦੀ ਅਪੀਲ 'ਤੇ ਜੋਧਪੁਰ 'ਚ ਹਾਈ ਕੋਰਟ ਦੇ ਜੱਜ ਮਨੋਜ ਕੁਮਾਰ ਗਰਗ ਨੇ ਅਦਾਕਾਰ ਸੈਫ ਅਲੀ ਖ਼ਾਨ, ਸੋਨਾਲੀ ਬੇਂਦਰੇ, ਨੀਲਮ, ਤੱਬੂ ਤੇ ਦੁਸ਼ਯੰਤ ਸਿੰਘ ਨੂੰ ਨੋਟਿਸ ਜਾਰੀ ਕੀਤਾ ਹੈ। ਇਸ ਮਾਮਲੇ 'ਚ ਅਦਾਕਾਰ ਸਲਮਾਨ ਖ਼ਾਨ ਨੂੰ ਦੋਸ਼ੀ ਠਹਿਰਾਇਆ ਗਿਆ ਸੀ। ਉਹ ਜੇਲ੍ਹ 'ਚ ਵੀ ਰਹੇ ਸਨ। ਹਾਲੇ ਉਹ ਜ਼ਮਾਨਤ 'ਤੇ ਬਾਹਰ ਹਨ।

ਜ਼ਿਕਰਯੋਗ ਹੈ ਕਿ ਪਿਛਲੇ ਸਾਲ ਅਦਾਕਾਰ ਸਲਮਾਨ ਖ਼ਾਨ ਨੂੰ ਸਾਲ 1998 'ਚ ਫਿਲਮ 'ਹਮ ਸਾਥ-ਸਾਥ ਹੈਂ' ਦੀ ਸ਼ੂਟਿੰਗ ਦੌਰਾਨ ਦੋ ਕਾਲੇ ਹਿਰਨ ਦੇ ਸ਼ਿਕਾਰ ਮਾਮਲੇ 'ਚ ਦੋਸ਼ੀ ਪਾਇਆ ਗਿਆ ਸੀ। ਹਾਲਾਂਕਿ, ਅਦਾਕਾਰ ਸੈਫ ਅਲੀ ਖ਼ਾਨ, ਸੋਨਾਲੀ ਬੇਂਦਰੇ, ਨੀਲਮ ਤੇ ਤੱਬੂ ਨੂੰ ਬਰੀ ਕਰ ਦਿੱਤਾ ਗਿਆ ਸੀ। ਮਾਮਲੇ 'ਚ ਸਲਮਾਨ ਖ਼ਾਨ ਨਾਲ ਉਕਤ ਸਾਰੇ ਬਾਲੀਵੁੱਡ ਕਲਾਕਾਰ ਸਹਿ ਮੁਲਜ਼ਮ ਸਨ ਤੇ ਇਨ੍ਹਾਂ ਸਾਰਿਆਂ ਨੂੰ ਸ਼ੱਕ ਦਾ ਲਾਭ ਦਿੰਦਿਆਂ ਸੀਜੇਐੱਮ ਦਿਹਾਤੀ ਅਦਾਲਤ ਦੇ ਅਧਿਕਾਰੀ ਦੇਵ ਕੁਮਾਰ ਖੱਤਰੀ ਨੇ ਬਰੀ ਕਰ ਦਿੱਤਾ ਸੀ। ਇਸ ਨੂੰ ਲੈ ਕੇ ਸਰਕਾਰੀ ਵਕੀਲ ਵੱਲੋਂ ਆਦੇਸ਼ ਨੂੰ ਚੁਣੌਤੀ ਦਿੱਤੀ ਗਈ ਸੀ। ਇਸ 'ਤੇ ਸੋਮਵਾਰ ਨੂੰ ਹਾਈ ਕੋਰਟ ਨੇ ਪੰਜ ਲੋਕਾਂ ਨੂੰ ਨੋਟਿਸ ਜਾਰੀ ਕੀਤਾ ਹੈ। ਅਪੀਲ ਦਾਇਰ ਹੋਣ ਤੋਂ ਬਾਅਦ ਅਦਾਲਤ 'ਚ ਨਿਸ਼ਚਿਤ ਸਮੇਂ 'ਚ ਅਪੀਲ ਦਾਇਰ ਨਾ ਕਰਨ ਦੀ ਗੱਲ ਉਠਾਈ ਗਈ ਸੀ, ਜਿਸ ਕਾਰਨ ਸੈਕਸ਼ਨ-5 ਦੀ ਅਰਜ਼ੀ ਅਦਾਲਤ 'ਚ ਪੇਸ਼ ਕੀਤੀ ਗਈ। ਇਸ ਅਰਜ਼ੀ ਨੂੰ ਸਵੀਕਾਰ ਕਰਦਿਆਂ ਅਦਾਲਤ ਨੇ ਸਾਰੇ ਮੁਲਜ਼ਮਾਂ ਨੂੰ ਨੋਟਿਸ ਜਾਰੀ ਕੀਤਾ ਹੈ। ਇਸ ਨੋਟਿਸ ਰਾਹੀਂ ਅੱਠ ਹਫ਼ਤੇ 'ਚ ਜਵਾਬ ਤਲਬ ਕੀਤਾ ਹੈ।